Ateneo de Cebu misabwag og mensahe sa paglaum

CEBU, Philippines — Ang Sacred Heart School-Ateneo de Cebu (SHS-AdC) nga gipangulohan sa presidente nilang si Fr. Manny A. Uy, SJ midalit og makatandog nga kanta pinaagi sa online aron isabwag ang mensahe sa pagka-ayo, pagkamabayanihon, ug paglaum taliwala ning pandemiya.

Sa usa ka video nga gi-post sa YouTube sa usa nilang ka magtutudlo nga si Anthony Heiji Suralta niadtong Huwebes, usa ka pinili nga grupo sa mga Ateneans ang kinasingkasing nga miawit sa 'Your Heart Today' nga tinagik ni Fr. Manoling Francisco, SJ ug ang musika gihan-ay ni Ms. Juliet Lim.

Ang dul-an sa unom ka minuto nga produksiyon nga gi-edit sab ni Suralta ubos a direksiyon ni Vicente R. Tan, nagsugod pinaagi sa ka mensahe sa ilang grade school student nga si Mikkel Sy. "These are dark and extraordinary times. The world cries out for healing, heroism, and hope. The Sacred Heart calls us to light each other's path, to embrace the suffering of our neighbors, and to ease the plight of our brothers and sisters," matud pa ni Sy.

Gisundan kini og laing makapadasig nga mensahe gikan ni Fr. Uy.

"Family and friends, let us do what we can, with whatever we have, wherever we are. Let us be the heart of Jesus in the world," dason pa ni Uy.

Giduyogan sa SHS-AdC String Ensemble, mikanta dayon ang mga Ateneans sa 'Your Heart Today'.

Ang ilang video tribute naglakip og mga hulagway nga pagpakita sa pagkamabayanihon sa mga frontliners nga ila sab gipauwanan og mensahe sa paglaum ug gugma.

Apil sa maong dalaygon nga obra mao ang pipila ka mga student-athletes sa SHS-Ateneo nga sila si Brianna Codina, John Edward Aguilar, Justin Maglasang, Tristan Fuentes, Joel Requioma, ang managsuong Dhexia Myle, Al Dustin ug Xavierra Myle Bersabal, Elysa Roque, Joey Villamayor, Kurt Laput ug Rey Michael Fuentes.

Uban sa mensahe sa mga Ateneans mao ang pag-ampo nga matag usa kanato mopasamin unta sa kasingkasing ni Hesukristo ngadto sa kalibotan.