PBA, D-League kanselado rin dahil sa ‘corona’
Closed-door games pinag-aaralan
MANILA, Philippines — Pansamantalang ki-nansela ng Philippine Basketball Association (PBA) ang Philippine Cup, 2020 PBA D-League Aspirants’ Cup at 3x3 event dahil sa coronavirus (COVID-19) outbreak.
Nabuo ang desisyon ng PBA Board of Governors kasama si Commissioner Willie Marcial matapos ang ilang oras na pagpupulong noong Martes ng gabi at pormal na inihayag ang anunsyo kahapon ng umaga.
Nais ng liga na matiyak ang kaligtasan ng mga fans, players, teams, officials at staff kaya’t tumugon ang liga sa panawagan ng gobyerno na nagdeklara ng Public Health Emergency.
“Considering the pre-sent situation surrounding COVID-19 and the Presidential declaration of Public Health Emergency, it is our paramount duty and responsibility to ensure the health and safety of our fans, players, teams, officials and staff,” ayon sa statement ng liga.
Wala pang petsa kung kailan ipagpapatuloy ang mga laro dahil pinag-aaralan pa ng liga ang sitwasyon. Nakadepende rin ito sa magiging anunsiyo ng Department of Health at World Health Organization.
“The league, however, will assess the effects of COVID-19 on a day-to-day basis guided by the parameters set by the DOH and WHO and will remain committed to conduct its games and activities in a safe and responsible manner for all its stakeholders,” ayon pa sa statement.
Pinag-aaralan pa ng PBA kung puwede ituloy ang mga laro ngunit walang fans na maaaring makapanood o mas kilala sa tawag na closed-door game.
“Nakita na mas maka-kabuti na suspend muna. Inisip din yung closed door, pero sa closed door mga 300-400 na tao rin ang gagalaw dun,” ani Marcial.
Hindi natuloy ang laro ng Talk ‘N Text at Phoenix, at ng NLEX at NorthPort sa Philippine Cup kahapon.
Kanselado na rin ang mga laban ng Seaoil-Far Eastern University at APEX Fuel Mindanao-San Sebastian College, Wangs-Colegio de San Juan de Letran at Family Mart-Enderun Colleges, at ng Technological Institute of the PhilippÅines at AMA Online Senior High ngayong araw sa Aspirants’ Cup ng D-League.
“Hindi na namin tinitingnan kung anong impact, kung schedule o pera. Ang iniintindi muna natin yung kalagayan nating lahat. Hindi na natin tinitingnan kung ano mawawala sa amin, anong maaano namin. Ang mahalaga yung safety ng lahat,” dagdag ni Marcial.
- Latest