Water Market padayong mihakot og daog
CEBU, Philippines – Mihakot na sab og laing daog ang Water Market sa Power Forty Basketball Tournament 50-above Sinulog Cup 2020.
Ang Water Market mipukan sa Park 'N Go Bakeshop sa iskor nga 52-49 niadtong Martes sa gabii diha sa Inayawan Sports Complex.
Si Atan Diaz mikandos og 14 puntos aron pangulohan ang Water Market nga kasamtangang nag-una sa standing bitbit ang 3-0 nga baraha.
Naglisud ang Water Market ni playing manager Vez Eleguin sa nag-unang duha ka kuwarter nga maoy hinungdan nabiyaan sila og otso puntos sa halftime, 18-26. Apan hinay-hinay mitubod ang ilang puntos sa fourth quarter hangtod nga naangkon ang tungason nga kadaogan.
Si Eduard Buhay maoy nangulo sa tulo ka magduduwa sa Park 'N Go nga miiskor og double figures pinaagi sa iyang 20 puntos.
Ang Park 'N Go ni Romy Rama adunay balanseng baraha nga 1-1.
Sa sayo pa, ang Sandal Broker miiskor sa una nilang daog sa dihang ilang gidemolis ang Nacario Massage Parlor, 61-49.
Gipangulohan ni Alex Cabreros ang Sandal Broker nga mikadlit og 18 puntos, gisundan nilang Welbor Cabrera ug Boy Allerta nga mitampo'g 13 puntos matag usa, ingon man si Julyan Capala nga adunay 11 puntos.
Sila lang si Cesar Alcordo ug Eman Navares ang naka-double digits sa Nacario Massage Parlor sa ilang 14 ug 10 puntos.
Sama sa Sandal Broker ni Alex Sandal, ang Nacario Massage Parlor ni Edgar Nacario nagtangag sab og 1-1 nga baraha ning maong liga nga nahimo pinaagi sa paningkamot ni 'el presidente' ug CESAFI head referee Edwin Dejacto Sr.
Ang mga duwa gipadagan ni league commissioner Dome Ozon, inabagan nilang Paw Dejacto, Talyo Tamarra ug Tedy Cabanada sa CEBRA.
PUNTOS MATAG USA
Unang duwa:
SANDAL (61) – Cabreros 18, Cabrera 13, Allerta 13, Capala 11, Nacional 6.
NACARIO (49) - Alcordo 14, Navares 10, Cantarona 8, Libre 7, Peligro 4, Zerna 4, Dela Peña 2.
Ikaduhang duwa:
WATER MARKET (52) – Diaz 14, F. Yosores 9, Tantiado 9, Lim 6, Fuentes 3, Ramil 3, Eleguin 2, Ozon 2, Dayota 2, Dela
Rama 2.
PARK 'N GO (49) – Buhay 20, Ebrado 10, Gaviola 10, Mosqueda 6, Pestaño 2, Dimitiman 1.
- Latest
