Abellar, Supatan nanghawod sa ilang dibisyon sa tilhaong motocross

CEBU, Philippines – Ang Sugboanong mga riders nga sila Jubenile Abellar ug Denden Supatan maoy naghawod sa tagsa-tagsa nila ka mga kategoriya sa 2nd Tilhaong Motocross Competition niadtong weekend didto sa Barangay Tilhaong, Consolacion.

Gipilde ni Abellar si Jonjon Adlawan aron sakmiton ang expert title, samtang si Supatan maoy mipahiluna sa ikatulong dapit.

Wala sab hinuon magpabentaha si Supatan  kay siya maoy naghari sa pro open division human gipilde si Adlawan. Si PC Cudisar maoy  miokupar sa ikatulong dapit.

Doble ang selebrasyon ni Supatan kay siya sab maoy nidominar sa intermediate category   batok nilang Erjun Codinera ug PC Cudisar.

Sa iyang bahin, si Adlawan wala maserohi gumikan kay siya maoy mibira sa korona sa 50cc open category.

Si Neil McPride nga usa sa mga nagdesinyo sa race course, mihimo sab og impresyon aron paglugwa niining kampiyon sa elite division.

Samtang si Pepo Rubi wala gihapo'y pagbahar hinungdan nga nakampiyon kini sa veterans class. Si Ryan Quirol nalandig sa ikaduhang puwesto ug gisundan kini ni Allan Padica.

Nalakip sab sa listahan sa mga mananaog mao sila si Jundy Bontuyan (novice open), Allan Padica (open enduro), Britz Hisoler (40cc open), Chai-Chai Lauron (ladies open), Nino Basco (85cc) ug Russell Quirol (beginner's open).

Giorganisar sa Team LMR ubos sa pagpangu ni Jojo Julien Ponce, ang  lumba gisalmotan og kapin 100 ka mga riders gikan sa nagkadaiyang dapit sa rehiyon.

Nagmalampuson kini gumikan sa suporta sa Consolacion LGU ubos sa liderato ni Mayor Joannes Alegado, mga opisyales sa barangay Tilhaong ubos sa pagtimon ni Barangay Captain Regie Lutao ug Psalm Property Ventures.