Sa ikatulong sunod-sunod nga higayon celtics mi-abante sa NBA East finals

CEBU, Philippines — Ang Boston Celtics mi-abante sa NBA Eastern Conference finals sa ikatulong sunod-sunod nga higayon.

Kini human hingpit nga gipatikangkang sa Celtics ang Cleveland Cavaliers pinaagi sa 113-98 nga kadaogan sa Game 5 sa ilang best-of-seven second-round playoff series kagahapon didto sa TD Garden sa Boston, Massachusetts.

Si Jayson Tatum mipupo og 25 puntos, 10 ka rebounds, ug siyam ka assists sa dihang gituldokan sa Celtics ang serye sa baraha nga 4-1.

Sa dihang nakasikit ang Cavs ngadto na lang sa dos puntos, ang Celtics milusad og nagkayong 13-2 rally aron inaton og balik ang ilang labaw ngadto sa 14 puntos, 101-87.

Gawas ni Tatum, lain pang lima ka Boston players ang mitali og double figures diin si Al Horford mi-iskor og 22 ug si Derrick White midugang og 18 puntos.

Si Jrue Holiday mihipos og 13 puntos samtang sila si Jaylen Brown ug Payton Pritchard dunay 11 puntos matag usa alang sa Celtics, nga makigkarong batok sa Indiana Pacers o sa New York Knicks alang sa luna sa NBA Finals. Didto sa Oklahoma City, ang Mavericks mipayaka sa Thunder, 104-92, aron pagposte og 3-2 nga bentaha sa ilang serye.

Ang Mavs motikang sa West finals kon ugaling ilang tiwasan ang Thunder sa Game 6 karong Dominggo didto sa ilang korte.

Si  Luka Doncic maoy nangu sa Mavs uban ang triple-double nga 31 puntos, 10 ka rebounds, ug 11 ka assists. Si Shai Gilgeous-Alexander mikolekta og 30 puntos, walo ka assists, ug unom ka rebounds apan nakawang ang iyang paningkamot sa habig sa Thunder.