Budenholzer nagpanikad nga mo-coach sa Suns

CEBU, Philippines — Si Mike Budenholzer gibati og tumang kahinam nga mokupot sa bag-o niyang papel isip head coach sa Phoenix Suns.

Atol sa pormal nga pagpaila-ila kaniya sa Phoenix managament kagahapon, si Budenholzer nagkanayon nga damgo gyud niya nga mo-coach sa Suns ilabi na kay lumad man siya nga taga-Arizona.

Nagpanikad nga moserbisyo sa yuta niyang natawhan, si Budenholzer namahayag nga bisan adto pa sa buwan o asang dapit sa kalibutan andam siyang motimon sa Suns.

"I think the biggest message I want you to hear: I would coach this team if it was on the moon," dason pa ni Budenholzer. "I would coach this team if it was in Alaska."

"If these players were in Denmark, these owners and front office, I would go anywhere to coach this team," dugang pa niya. "That's the most important thing for me. I'm excited about the roster."

Ang Suns mipalagpot ni coach Frank Vogel 11 ka adlaw human sila gi-sweep sa NBA playoffs sa Minnesota Timberwolves.

Gikuha siya niadtong Hunyo aron mohulip sa puwesto ni Monty Williams apan ang Suns nasugamak gihapon ilabi na kay gihamok og injury sa tulo nila ka mga star players nga sila si Kevin Durant, Bradley Beal, ug Devin Booker.

Karon nga nahatagan og tsansa, si Budenholzer madasigon nga mogiya sa tulo ka mga bitoon nga maoy nag-una niyang misyon .

"I'm excited about working with this roster and these players," padayon pa ni Budenholzer.  "We have great players and with great players come great expectations."

Si Budenholzer migiya sa Milwaukee Bucks ngadto sa NBA title niadtong 2021 apan gipapahawa human natagak ag Bucks sa unang hugna sa playoffs niadtong 2023. Wala siya mo-coach sa miaging season.