Guiao miretiro pagka-coach sa Gilas

CEBU, Philippines – Miluwat sa iyang katungdanan si Yeng Guiao isip head coach sa Gilas Pilipinas pipila ka adlaw human sa ilang kampanya sa FIBA World Cup didto sa China.

Gikompirmar ni Guiao ang iyang pagretiro   pinaagi  sa  gipagawas nga statement sa Sports5 kagahapon. Ang iyang pag-resign nahitabo pipila ka oras human siya nakigtigum sa   mga opisyal sa Samahang Basketbol ng Pilipinas (SBP).

Ang multi-titled PBA coach una na nga nangayo og pasaylo human sa ngil-ad nilang performance  diin miuli sila nga walay daog nabitbit  sud sa lima ka duwa. Pakyas usab ang Gilas pagsakmit sa automatic Olympic slot human sila mapilde sa classification stage batok sa Tunisia ug Iran.

Si Guiao gitahasan nga mokupot sa Gilas hulip ni coach Chot Reyes niadtong miaging tuig atol sa Asian Games diin mipuwesto ang koponan sa ikalimang dapit.

Bisan pa sa kakulang sa players human sa gipahamtang nga silot sa FIBA tungod sa karambola nga nahitabo niadtong Hulyo sa miaging tuig tali sa Gilas ug Australia, si Guiao  nakahimo paggiya sa Pilipinas ngadto sa   World Cup.

"I truly and fully appreciate the efforts and sacrifices of all the players; not just those of the recent FIBA World Cup Team, but of all those who have contributed to the program since my appointment as head coach for the 2018 Asian Games," matud pa ni Guiao. "I would also like to extend my personal thanks to the coaching staff, trainers, utilities and the management of the Gilas Team for their hard work, support, and cooperation."

Si Guiao miingon nga luag  sa   iyang dughan ang pagnaog sa maong posisyon  ug    salig siya nga makabangon ang  nasudnong koponan sa  mosunod nga   internasyonal nga mga torneyo.

"Above all, I am most thankful to SBP Chairman Manny V. Pangilinan and SBP President Al Panlilio for the opportunity to have been of service to the country in the sport I love most,"  sumala pa niya.

Si Guiao midugang nga wala siya hingpit nga mitalikod sa national team ug andam siya mohatag og tabang sa bisan unsa nga paagi ilabi na sa mosunod nga coach sa Gilas.