Petrogazz humirit pa
MANILA, Philippines — Hindi na pinaporma ng PetroGazz Angels ang Creamline Cool Smashers sa fourth set upang itakas ang 15-25, 25-22, 25-22, 25-12 panalo kahapon sa Game 2 ng best-of-three Finals series at humirit ng do-or-die battle sa 2019 Premier Volleyball League Reinforced Conference sa Fil-Oil Flying V Arena sa San Juan City.
Sa malaking panalo, bibiyakin ng Cool Smashers at Gazz Angels ang 1-1 tabla sa serye sa muling paghaharap sa Game 3 ngayon sa Ynares Sports Center sa Antipolo City.
Matapos makuha ng Cool Smashers ang unang set, 25-15 bumawi ang Gazz Angels sa pangunguna nina Janisa Johnson at Cuban Wilma Salas sa ikatlong set at hindi na binitiwan ang momentum hanggang sa huling sandali ng laro.
Tumapos si Johnson ng 23 puntos kabilang na ang 18 atake, tatlong blocks at dalawang aces habang si Salas ay humataw din ng 23 puntos.
“Bago kami maghiwa-hiwalay ngayon, we need first to evaluate our game today. Then after that we need to take a good rest so that we can have a good energy tomorrow,” ani PetoGazz coach Arnold Laniog.
Si Jonah Sabete ay tumulong din ng siyam na puntos at walo mula kay Janeth Panaga para sa Angels ni coach Laniog at bumawi sa kanilang 26-24, 16-25, 16-25, 22-25 talo sa Game 1 noong Miyerkules.
Pinangunahan ni Alyssa Valdez ang Creamline sa kanyang 17 puntos at 13 naman kay Kuttika Kaewpin ng Thailand.
Sa iba pang laro, nasungkit ng Pacific Town-Army Lady Troopers ang 25-23, 20-25, 25-20, 25-23 panalo laban sa Banko Perlas para itabla sa 1-1 ang kanilang best-of-three battle for third place.
Samantala, nakuha naman ni Alyssa Valdez ang ikatlong MVP award makaraang hiranging top player sa PVL Reinforced Conference.
Bukod sa top individual award, si Valdez na rin ang 2nd best open spiker sa torneo. Ang ibang awardees ay sina Nicole Tiamzon (1st Best Open Spiker), Dzi Gervacio (best opposite hitter), Kathy Bersola (1st Best Middle Blocker), Angela Nunag (Best Libero) at Jia Morado (Best Setter).
- Latest