Monterroyo-Jordan daog dayon sa laba

CEBU, Philippines – Gisugat dayon og daog ang reigning champion Monterroyo-Jordan sa una nilang duwa sa LABA Summer League 2019 niadtong Lunes didto sa Co Tiao King gym sa Tabok, Dakbayan sa Mandaue.

Dili tiaw ang kadaogan sa Monterroyo-Jordan nilang Dr. Raul Monterroyo ug Richard Jordan kay gilubong nila ang Explore Travel & Tours nilang William Oljol, Dr. Jun Borces, Eboy Quiñahan ug Roy Ermac sa iskor nga 72-50.

Si Jordan miposa og tulo ka tres sa iyang 15 puntos aron mangu sa upat niya ka bataan nga miiskor og double digits.

Ang laing tulo mao si Tawing Grafe nga miamot og 12 puntos ug sila si Skor Zambo ug Michael Tañan nga nagtampohay og 10 puntos sa Monterroyo-Jordan nga miposte og 38-26 nga bentaha sa halftime.

Katag kaayo ang duwa sa Explore Travel & Tours sa second half ilabi na sa depensa hinungdan nga sayon  ra kaayo nakapasud sa ilang opensa ang Monterroyo-Jordan.

Si Nante Borces mao lang ang nakaiskor og double figures sa Explore Travel & Tours sa iyang 12 puntos.

Sa sayo pa, ang  team ni Tony Alcover gisubhan sab og daog batok sa team ni Gilbert Lesin sa iskor nga 67-57.

Gipangulohan ni 

Ramie Suson ang team  Alcover nga mipatuasik og 24 puntos, gisundan ni Jong Cabonilas sa iyang 12 puntos.

Samtang ang team Lisen gipangulohan nilang Richard Lawas ug Erwin Budiongan nga nagkumboya'g 27 puntos.

Sikit kaayo ang duwa gikan sa pagsugod ug nahimo pa ganing kulbahinam ang aksiyon dihang nakasikit ang team Lisen sa katapusang higayon, 55-57  sa nahibiling dos minutos sa  fourth quarter.

Misuway pa ang Lisen sa pagkawat sa labaw, apan bisan giunsa nila paningkamot wala gyud sila motunhay kay gihinay-hinay og bingat sa Alcover ang ilang labaw pinaagi sa mga free throws.

Ang liga namugna pinaagi ni P/Capt. Dondon Coloscos sa abag nilang Roy Ermac, Lloyd Chavez, Willy Medillo, Nante Rayla ug Macmac Borga.

PUNTOS MATAG USA

Unang duwa:

ALCOVER (67) –  Suson 24, Cabonilas 12, Bukiron 10, Castillo 5, Herbieto 5, Mahusay 4, Catapusan 4, Alcover 2, Alquezar 2.

LISEN (57) – Lawas 16, Budiongan 11, Recto 8, Lisen 7, Alfanta 6, Ocier 4, Ecot 3, Cena 2.

Ikaduhang duwa:

MONTERROYO-Jordan (72) – Jordan 15, Grafe 12, Zambo 10, Tañan 10, Canjo 7, Yu 5, Pasaol 4, Mendoza 4, Elarde 3, Monterroyo 3, Virallo 3.

EXPLORE Travel & Tours (50) – N. Borces 12, Madrid 7, Royo 5, J. Borces 4, Ermac 4, Del Castillo 4, Ouano 3, Ornopia 3, Oljol 2, Beldera 2, Mauro 2, Ramos 2.