Roach salig ni Pacquiao palukapahon si Broner
CEBU, Philippines — Masaligon kaayo si 'Hall of Fame' trainer Freddie Roach nga patikangkangon ni Manny Pacquiao si Adrien Broner sa giatngan nilang sangka duha ka semana gikan karon didto sa Amerika.
Mismo si Pacquiao ang mipadayag nga daog pinaagi sa knockout maoy iyang laraw sa pagdepensa niya sa iyang WBA welterweight title batok ni Broner karong Enero 20 didto sa MGM Grand Garden Arena sa Las Vegas, Nevada.
Sayod si Roach nga lig-on ug gahi og apapangig si Broner, apan malaumon siya nga makit-an ra unya ni Pacquiao ang patyanan niini.
Tataw nga usa ka lisud nga misyon ang sagubangon ni Pacquiao gumikan kay si Broner wala pa man malukapa sud sa 38 ka away.
Madasigon hinuon si Pacquiao nga iyang mahimo kang Broner ang iyang gibuhat ni Lucas Matthysse nga iyang gipatukay-ang sa ikapitong hugna aron sakmiton ang korona sa WBA sa miagi niyang away niadtong Hulyo 2018 didto sa Kuala Lumpur, Malaysia.
- Latest
