Cavs mi-trade ni Korver sa Jazz
CEBU, Philippines – Mapunta og balik sa poder sa Utah Jazz ang beteranong tirador nga si Kyle Korver human siya gi-trade sa Cleveland Cavaliers.
Si Korver nga mitabang paggiya sa Cavs pagtaak sa NBA Finals sa duha ka higayon, gilabay sa Cavs ngadto sa Jazz hulip ni Alec Burks ug sa duha ka umaabot nga second-round draft picks sa Utah.
Ang 37-anyos nga si Korver miabot sa Cleveland niadtong Enero 2017 pinaagi sa usa ka trade uban sa Atlanta Hawks ug unom ka bulan ang milabay mipirma og multi-year contract sa Cavs.
Gikataho nga ang Cavs misaad nga i-trade si Korver kun ugaling si LeBron James mobiya sa Cleveland sa free agency.
Tuod man, si James misibat sa Cavs aron motapon sa Los Angeles Lakers niadtong Hulyo ning tuiga.
Si Korver nga ikaupat sa all-time list sa dunay labing daghan nga naposa nga tres nga miabot na ngadto sa 2,238, nakasilbe og 16 ka duwa sa Cleveland karon nga season diin siya mi-average og 6.8 points.
Ang kahait sa iyang tinirahan tataw nga makapalig-on sa Jazz sa iyang pagbalik sa Utah sa ikaduhang higayon. Si Korver nakaduwa uban sa Jazz niadtong Disyembre 2007 hangtod sa 2009-2010 season. (BANAT NEWS)
- Latest
