San Beda Puro Na
Laro sa Nobyembre 12 (2pm Mapua vs La Salle Greenhills (Jrs)
4pm SBU vs LPU (Srs)
MANILA, Philippines — Mabangis ang nagdedepensang San Beda University nang sakmalin nito ang Lyceum of the Philippines, 73-60 upang makalapit sa kampeonato sa NCAA Season 94 men’s basketball tournament sa Mall of Asia Arena sa Pasay City.
Balanseng atake ang pinakawalan ng Red Lions sa pangunguna ni Javee Mocon na umiskor ng double-double na 14 points at 10 rebounds para dalhin ang kanilang tropa sa 1-0 bentahe sa best-of-three championship series.
“Even without CJ (Perez) we only beat them by 13 points. CJ is averaging more than 18 points a ball game so Game 2 will be a difficult task for us but again we really have to control the tempo, we cannot play up and down against LPU,” ani San Beda mentor Boyet Fernandez.
Nag-ambag naman si Robert Bolick ng 12 markers habang may 11 points si Clint Doliguez at sariling double-double na 10 points at 16 boards si Donald Tankoua para sa San Beda.
Malaking kawalan si CJ Perez na binigyan ng isang-larong suspensiyon ng NCAA Management Committee matapos mabigong ipaalam ang kanyang aplikasyon sa PBA Annual Rookie Draft.
Wala pa sa isip ng Red Lions ang selebrasyon dahil magbabalik-aksiyon si Perez sa Game 2.
Nanguna para sa Pirates si Mike Nzeusseu na may 16 markers at Marcelino twins na sina Jaycee at Jayvee na may tig-13 puntos.
Sa juniors, naiselyo ng College of Saint Benilde-La Salle Greenhills ang 74-69 panalo laban sa Mapua sa Game 1 ng kanilang sariling best-of-three championship series upang makalapit sa inaasam na kampeonato.
Samantala, nasungkit ni Prince Eze ng University of Perpetual Help System Dalta ang season MVP award matapos makalikom ng 61.39 statistical points.
Nakuha rin ng 6-foot-10 Nigerian ang Defensive Player of the Year bunsod ng nakolekta nitong 297 rebounds, 59 blocks at tatlong steals.
Makakasama naman ni Eze sa Mythical Five sina Bong Quinto ng Letran at sina San Beda aces Bolick, Mocon at Tankoua.
Kasama sana si Perez sa Mythical Team subalit nadiskwalipika ito dahil sa kanyang suspensiyon.
Nakuha ni Larry Muyang ng Letran ang Rookie of the Year award habang Most Improved Player si Archie Concepcion ng Arellano University.
- Latest
