Gilas batok Iran karon, Slaughter wa maapil
CEBU, Philippines – Atubangon na sa Team Pilipinas ang usa ka lisud nga hagit sa ilang pakigsangka sa higanteng Iran sa second round sa 2019 FIBA World Cup qualifiers karong gabii didto sa Tehran, Iran.
Ang mga Pinoy cagers makigsangka sa mga Iranian sa alas-9:30 sa gabii (oras dinhi sa Pilipinas) didto sa Azady Gym.
Ang Samahang Basketbol ng Pilipinas mipagawas sa opisyal nga Final 12 nga moduwa karon diin nasayran nga wala na gilakip ni coach Yeng Guiao sa lista ang 7-footer nga si Greg Slaughter.Nasayran nga si Guiao una na nga miingon nga dili na niya ipugos pagpaduwa ang Cebuano center kung maglisud kini tungod sa iyang gihambin nga injury sa tiil.
Mobida karon batok sa Iran mao ang Fil-German standout nga si Christian Standhardinger, Beau Belga, Ian Sangalang, JP Erram, Raymond Almazan,Gabe Norwood, Paul Lee,Allein Malkisi, Asi Taulava, Japeth Aguilar, Matthew Wright ug mga bag-ong sakop nga sila si Marcio Lassiter ug Alex Cabagnot.
Si Guiao nagkanayon nga sa pagkawala ni Slaughter, giawhag niya iyang mga bigmen nga magtinabangay aron depensaan ang star center sa Iran ug ex-NBA cager nga si Hamed Haddadi.
Bisan og lisud, ang multi-titled PBA coach pabiling positibo sa ilang tsansa diin gibutyag niya nga daku ilang tsansa nga mudaog kung mapugos nila ang usa ka sikit nga engkuwentro batok Iran.
Tungod kay biya sa gitas-on, si Guiao musandig sa iyang mga guwardiya nga maoy mudala sa duwa gamit ilang kapaspas ug outside shooting.
- Latest
