Registration sa 24th Sunsport basketball camp kutob lang karon

CEBU, Philippines - Kadtong mga batan-on nga basketbolista nga gustong mosalmot sa 24th Sunsport Basketball Training Camp gihatagan lamang hangtod karong adlawa aron magparehistro diha sa Sacred Heart Center Sports Club sa may dalan D. Jakosalem ning dakbayan sa Sugbo.

Ang pagpanglista gikatakda gikan sa alas-9 sa  buntag  hangtod sa alas-5 sa hapon.

Pormal nga mosikad ang tinuig nga summer clinic karong Abril 3. Abli kini ngadto sa mga mahilig og basketbol nga nag-edad og  7-anyos pataas.

Ang rehistrasyon nagkantidad og P1,300 apil na niini ang training jersey, basketball, shoe bag ug t-shirt.

Alang sa dugang mga impormasyon, kadtong mga interesado mahimong mokontak sa telepono 345-1015 o 0923-8697421.

Ubos sa superbisyon ni coach Jojo Romarate, ang pagbansay-bansay pagahimuon matag adlaw gikan sa alas-8 hangtod sa alas-10 sa buntag alang sa 7-anyos ngadto sa 11 anyos nga mga entrante ug gikan sa alas-10 sa buntag hangtod sa alas-12 sa udto alang sa mga campers nga nag-edad og 12-anyos pataas. (BANAT NEWS)