Nietes “top athlete” sa PSA

CEBU, Philippines – Ang bitoon sa ALA Boxing Gym nga si Donnie ‘Ahas’ Nietes makigsawo sa bantawan sa kadungganan uban sa kababayan niining world champion sab nga si Nonito ‘The Filipino Flash’ Donaire, Jr. ug golf sensation Miguel Tabuena isip co-Athletes of the Year sa Philippine Sportswriters Association (PSA) Awards Night karong Pebrero 13 didto sa One Esplanade, dakbayan sa Pasay City.

Sila si Nietes, Donaire ug Tabuena tunolan sa maong prestihiyosong pasidungog gumikan sa paghatag nila og kahayag sa kalibotan sa  paugnat sa kusog sa miaging tuig. Mao kini ang labing unang higayon nga si Nietes ibayaw isip usa sa mga top athletes sa tinuig nga kalihukan sa PSA.

Giablihan ni Nietes ang tuig 2015 sa paglingkod sa trono isip ‘longest-reigning Filipino world champion’. Iyang nalabwan ang kanhiay’ng rekord ni anhing Gabriel ‘Flash’ Elorde.

Sud sa tulo ka higayon, ang 33-anyos nga garbo sa Murcia, Negros Occidental milampos pagdepensa sa iyang WBO light flyweight title batok nilang Gilberto Parra ug Francisco Rodriguez Jr., ug ang labing uwahi batok ni Juan Alejo sa makasaysayanon nga labing unang Pinoy Pride event sa Amerika niadtong Oktubre 18 didto sa StubHub Center sa Carson, California.

Samtang si Donaire mihimo og impresyon sa pagbalik niya og away sa miaging tuig.

Human makatilaw og makapakugang nga kapildihan sa dihang gipatikangkang siya sa ikaunom nga hugna ni Nicholas Walters sa ilang world featherweight title bout, mangtas ang gihimong pagbalik ni Donaire nga iyang gisugdan pinaagi sa pagpakamang  ni Brazilian William Prado sud lamang sa duha ka hugna niadtong Marso. Iya kining gisundan pinaagi sa pagpalukapa ni Anthony Settoul sa France sud gihapon sa duha ka hugna upat ka bulan ang milabay.

Apan ang labing daku nga kalampusan sa 33-anyos nga si Donaire iyang nakab-ot human iyang gipukan ang Mehikanong si Cesar Juarez sa brutal ug eksplosibo niyang binukbukay aron pag-angkon og balik sa iyang WBO super bantamweight title didto sa San Juan, Puerto.

Sa iyang bahin, si Tabuena makigsawo nilang Nietes ug Donaire sa entablado human sa makapakurat niyang pagbuntog sa Australyanong si Scott Barr pinaagi lamang sa usa ka stroke aron paglangkat sa labing una niyang kampiyonato sa prestihiyosong Philippine Open. (BANAT NEWS)