World Champion uli si Donaire Mexican tinalo via unanimous decision
MANILA, Philippines – Muling hinirang si Nonito “The Filipino Flash” Donaire Jr. bilang world boxing champion.
Ngunit hindi ito naging madali para sa dating world four division world champion.
Kinailangan ni Donaire na pabagsakin si Mexican Cesar Juarez ng dalawang beses sa fourth round, malampasan ang namamagang kaliwang mata, putok sa itaas ng kanang mata at ankle injury sa sixth round para angkinin ang bakanteng World Boxing Organization super bantamweight crown kahapon sa Coliseo Roberto Clemente sa San Juan, Puerto Rico.
Kumuha si Donaire (36-3-0, 23 KOs) ng 116-110, 116-110 at 117-109 points mula sa tatlong judges para talunin si Juarez (17-4-0, 13 KOs) .
Ang WBO super bantamweight title ay tinanggal kay two-time Olympic Games gold medalist Guillermo Rigondeuax (16-0-0, 10 KOs) matapos hindi lumaban sa loob ng 11 buwan.
Ito naman ang ikatlong sunod na panalo ni Donaire matapos maisuko ang kanyang dating bitbit na World Boxing Association featherweight belt kay Jamaican Nicholas Walters via sixth-round knockout noong Oktubre noong nakaraang taon.
Dating isinuot ni Donaire ang mga korona ng IBF/IBO flyweight, WBO/WBC bantamweight, WBO/IBF super bantamweight at WBA featherweight.
Bago pa ang kanilang laban ay paborito nang manalo ang 32-anyos na si Donaire laban sa 24-anyos na si Juarez.
Subalit nabigla ang lahat nang malampasan ni Juarez ang dalawang sunod na pagpapatumba sa kanya ni Donaire sa fourth round para tapusin ang kanilang 12-round championship fight.
Payag si Donaire, hinirang bilang 2012 Fighter of the Year matapos talunin sina Wilfredo Vasquez Jr., Jeffrey Mathebula, Toshiaki Nishioka at Jorge Arce, na bigyan ng rematch si Juarez.
“I will definitely give him a rematch,” sabi ng tubong Talibon, Bohol sa Mexican fighter.
Kagaya ng dapat asahan ay hindi naniniwala si Juarez na nadomina siya ni Donaire.
“The judges were not fair,” sabi ni Juarez. “It was much closer, like a one or two point fight. But I do think Donaire won.”
- Latest