UV Lancers adunay misyon sa PCCL

CEBU, Philippines – Mogikan na karong buntag ang University of the Visayas (UV) Green Lancers aron mopakita sa ilang abilidad sa Philippine Collegiate Champions League (PCCL) Elite Eight. Bitbit nila ang hagit nga palabwan pa ang ilang nakab-ot sa miaging edisyon sa tinuig nga torneyo nga salmotan sa labing tang-an nga collegiate teams sa nasud.

Sa labing una niyang pagkupot sa tahas isip UV coach, si Gary Cortes mihimo dayon og impresyon human iyang gigiyahan ang Lancers ngadto sa 63-60 nga kadaugan batok sa University of San Carlos (USC) Warriors aron pagpahiluna sa ikatulong dapit sa 2014 PCCL National Finals.

Samtang ang Warriors nakaangkon og awtomatik nga luna sa Elite Eight knockout stage isip kampiyon sa Cebu Schools Athletic Foundation, Inc. (CESAFI), ang Lancers nag-agi pa usa og qualifying event. Miabante ra hinuon sila sa national finals human gidominar ang PCCL Vis-Min Zonal sa miaging semana didto sa dakbayan sa Ormoc.

“We are going there not to participate, but to compete,” matud pa ni Cortes agi’g padayag sa ilang kaandam sa pakiggubat batok sa Manila teams.

“We are asking all the Cebuanos to please help us pray for our safety and victory not only for UV but for USC as well. We’re ready and I'm confident that my boys will give their best shot in the tournament,” dugang pa ni Cortes.

Gipangulohan ni Cameroonian import Steve Cedrick Akomo, si Cortes maglaum sab nilang Leonard Santillan, Franz Arong, Alfred Codilla, Arvie Cabañero, Alwin Aguirre, Vincent Mendoza ug June Kent Manzo.

Mokompleto sa solido nilang line-up sa PCCL mao sila si Josue Segumpan, Rey Suerta, Jayson Balabag, Michael Macion, Jerome Napao ug newcomers Monic Soliva ug Christian Bolaño.

Ang Lancers moabli sa ilang kampanya batok sa National University (NU) Bulldogs o dili ba sa Jose Rizal University (JRU) Bombers sa Lunes sa alas- 2 sa hapon didto sa Faith Gym sa Tanauan City, Batangas.

Ang labing taas nga nakab-ot sa UV sa maong torneyo mao ang ikaduhang puwesto niadtong tuig 2007. Gilabhan sila sa Ateneo Blue Eagles sa final, 54-71. (BANAT NEWS)