Vineyard miani na gyud og daog sa King Properties tilt

CEBU, Philippines – Miani na gyud og daog ang Vineyard  pinaagi sa paglubong sa Mecu Plumbing, 57-38 sa 1st Kings Properties Inter-Contractor  Basketball Tournament didto sa Guadalupe  Sports  Complex.

Kini ang unang daog sa Vineyard sud sa upat nila ka duwa.

Si Niño Calderon mao na sab ang nangu sa  Vineyard nga mipupo’g 13 puntos, gisundan ni Ivan Alcontin  nga nangumpay og 10 puntos.

Ang Mecu Plumbing nga mao na lang ang wala katilaw og daog sa pito ka mga entranteng koponan, gipangulohan ni Jimmy Tuico nga miariya og 12 puntos.

Sa laing aksiyon, daku kaayong garbo alang sa RNM2 gumikan sila pa ang nakabuntog sa kanhi wa’y pildeng Kings Properties human makaipsot sa iskor nga 48-42.

Gipangulohan ni Nestor Abao ang RMN2 nga miratsada’g 16 puntos, samtang ang nadisgrasya nga Kings Properties gipangulohan sab ni Marco Vasquez, kinsa mitikdol og 11 puntos, gisundan ni James Cabardo nga mitimbre’g 10 puntos.

Bisan pa sa ilang kapildihan, ang Kings Properties mao gihapon ang nag-una sa standing nga adunay 4-1 win-loss record.

Midaog sa ikatulong higayon ang Mecu Fire Pro pinaagi sa pagdemolis sa Salera Construction, 55-45 ubos sa pagpangulo nilang Bryan Conil ug Paul Miroy nga nagkumboya’g 39 puntos.

Sila si Jomar Mondragon ug Boy Ganggan mao sab ang nangu sa   Salera Construction nga nagkumbinar og 25 puntos.

Ang Mecu Fire Pro ug RMN2 nagsawo karon sa ikaduhang dapit sa standing sa managsama nilang 3-1 nga baraha ning maong torneyo nga gipasiugdahan ni Engr. Fritz Canono inabagan ni Tim Adlawan. Gipadagan ang duwa ni league commissioner Marjorie Martinez ug ni technical committee CESAFI head referee Edwin Dejacto Sr.

Puntos Matag Usa

Unang duwa:

VINEYARD (57) – Calderon 13, Alcontin 10, Tanudra 8, Baguio 8, Lazarte 7, Bayawa 5, Tortoga 4, De Castro 2.

MECU PLUMBING (38) – Tuico 12, Casas 8, J. Cadorna 5, Sasac 4, Cadorna 2, Pugora 2, Caballa 2, Otat 2, Oliver 1.

Ikaduhang duwa:

RNM2 (48) – Abao 16, Secusana 8, Nacario 6, Magadan 5, Caramonte 4, Toledo 3, Pasculado 2, Maratas 2, Caballes 2.

KINGS PROPERTIES (42) – Vasquez 11, Cabardo 10, Mirasol 9, Millomida 6, Payo 2, Bacala 2, Zulueta 2.

Ikatulong duwa:

MECU FIRE PRO (56) – Conil 24, Miroy 15, Lagunzad 7, Resterio 5, Salgado 3, Montalban 2.

SALERA CONST. (45) – Mondragon 15, Ganggang 10, Novabos 7, Escoba 6, Zapanta 5, Abraham 2. (BANAT NEWS)