Tiunay’ng garbo sa mga Pinoy

Samtang sa inyong pagbasa ning maong lindog, nagbiyahe na ako padung sa Amerika aron sagubangon ang laing mahinungdanong boxing coverage alang sa The Freeman ug siyempre sa igsuon niining mantalaan nga Banat News.

 Pila ra’y dagan sa adlaw human ko nikober sa “Fight of the Century” tali nilang Manny Pacquiao ug Floyd Mayweather  Jr. niadtong Mayo 3 didto sa MGM Grand sa Las Vegas, makataak na sab ko’g balik sa nataran ni Uncle Sam aron paghatod kaninyo og lab-as nga mga balita kabahin sa  makasaysayanong event sa Philippine sports.

 Ang akong gipasabot mao ang labing unang Pinoy Pride boxing card sa Amerika nga gikatakda karong Oktubre 17 (karong Domingo oras  sa Pilipinas) didto sa StubHub Center sa Carson City, California.  Sa maong eksplosibong card, moaway si Donnie ‘Ahas’ Nietes,   ang gikaintapang managsuon nga sila si ‘Prince’ Albert ug Jason ‘El Niño’ Pagara ug ingon man ang sumusulbong nga bitoon sa ALA Stable nga si Mark ‘Magnifico’ Magsayo.

Sama sa titulo sa maong giatngan nga promosyon, tinuod gyud nga  ‘Pinoy Pride’ kon garbo sa tibuok nasudnong Pilipinhon ang maong gihimo sa ALA Promotions International inabagan sa ABS-CBN Sports ug The Filipino Channel pagpasiugda og usa ka major boxing event sa US.

Dili tiaw ang maong tahas nga hingpit nga nahatagan og katumanan sud sa pipila ka tuig nga makuting pagplano. Pagkuha pa lang daan og lisensiya aron maka-promote didto sa California gihulagway nang daan ni ALA Promotions President ug CEO Michael Aldeguer nga usa ka mabug-at nga misyon.

Apan sa pagpursigi ug determinasyon, nakab-ot sa ALA Promotions ang ilang gitinguha ug karon plastada na ang tanan alang sa labing daku nilang promosyon sukad nahimugso ang ALA Boxing tulo ka dekada na ang milabay ubos sa pagtimon ni Cebu boxing patron Antonio ‘Bidoy’ L. Aldeguer.

Sa maong lakang sa ALA, dili lamang niini mapasalida ang katakus sa mga Pinoy’ng boksidor sa mas daku ug pabulosong bantawan sa boksing didto sa Amerika, apan ila sab nga mapakita sa tibuok kalibotan nga ang usa ka boxing outfit gikan sa Pilipinas partikular nga naggagikan pa gyud sa Sugbo duna sa’y kapasidad nga mo-promote sa maong dapit nga gitawag nga 'boxing mecca of the world."

Mao nang makaingon ko nga tiunay gyud nga garbo sa mga Pinoy ang gibuhat sa ALA Promotions agi’g pagtambayayong sa ABS-CBN Sports. Inubanan sa hilom nakong pag-ampo, akong panghinaut nga magmalampuson unta ang ika-33 edisyon sa nabaniog nang Pinoy Pride series kansang binhi dinhi gitanom sa pinangga natong Sugbo.

Kun dunay mga komentaryo o reaksiyon mahimong mo-email sa [email protected].