Tilhaong, Polog sud finals sa Consolacion fiesta cup

CEBU, Philippines – Ang Tilhaong ug Polog mitagak sa ilang mga kontra aron pagmartsa ngadto sa finals sa tagsa-tagsa nila ka dibisyon sa 5th Mayor Teresa P. Alegado Mayor’s Cup Fiesta Basketball League didto sa Cansaga gym sa Consolacion, Cebu.

Ang Tilhaong nakabawi human sa bugnaw niining sinugdanan aron pagpakaging sa Garing, 52-50 ug ingon man  pag-abante sa kampiyonato sa SK Category B, samtang si playing coach Ian Flores maoy milansang sa winning basket alang sa Polog nga midaog batok sa Garing sa overtime, 75-73 aron pagbira sa unang luna sa finals sa  Inter-Barangay Senior Category B.

Si Tilhaong councilor Regie Lutao  nga mao sab ang coach sa iyang koponan, emosyonal kaayo sa ilang daog gumikan kay ang Garing man maoy mipalayas kanila sa torneyo sa miaging tuig. Nagtabla ang iskor, 50-all  sa nahibiling 22 segundos, apan si Dumaguit mipasud sa iyang buzzer-beating lay-up aron pag-aswat sa Tilhaong ngadto sa kadaugan.

Susama sab ang nahitabo sa laing duwa diin si Polog barangay councilor Ian Flores kalmado kaayong mipasud sa iyang follow-up shot gikan ra sab sa iyang offensive rebounds nga maoy nahimong yawi nila ngadto sa naglagiting nga kadaugan.

Ang Tilhaong ug Polog segurado na nga makabaton og ‘twice-to-beat’ incentive samtang sila magpaabot sa kun kinsay makontra nila sa finals.

Ang maong usa ka bulan nga torneyo   gipaluyohan ni Consolacion Mayor Teresa ‘Nene’ Alegado ug Vice Mayor Rey Damole. Gipangulohan kini nilang municipal councilors Nilo Ferraren ug Boy Tibon ug ABC President Marilou Casul.

Ang mga duwa ubos sa superbisyon ni commissioner Paul Alelu Q. Flores, kanhi star player sa Far Eastern University (FEU) Tamaraws sa dihang nagduwa pa siya sa UAAP, inabagan ni technical committee head Aurelio Eslawan. (BANAT NEWS)