Basadre, Demecillo ilog na sa WBF Asia Pacific Belt
GENERAL SANTOS CITY, Philippines – Laraw sa duha ka regional champions nga sila si Daryl ‘Flash’ Basadre (14-2-1, 10KOs) sa Sanman Boxing ug Kenny Demecillo (9-3-1, 6KOs) sa Omega Boxing Stable sa Cebu nga tapuson na nila ang wala matiwas nilang isyu sa dumot nilang ‘rematch’ alang sa WBF Asia Pacific bantamweight title sa main event sa ‘Brawl at the Mall: Revenge or Revalidation” fight card karong hapon sa Gaisano Mall Atrium dinhi.
Ang una nilang engkuwentro tulo pa ka bulan ang milabay naputos og kontrobersiya diin si Demecillo, ang WBA Oceania bantamweight champion, midaog pinaagi sa ‘technical knockout’ sa ikaduhang hugna.
Karon nga mag-abot na usab ang ilang dalan, hayan nga dakung gubat ang ilusad nilang Basadre ug Demecillo sa tinguha nga tuldokan na ang pangutana kun kinsa’y mas tadhan nilang duha.
Gawas sa sangka nilang Basadre ug Demecillo, eksplosibong undercards ang gihan-ay ni Sanman Promotions CEO Jim Claude Manangquil aron pagseguro nga magmalampuson ang buena manong edisyon sa iyang “Brawl at Mall’ series.
Nag-una sa listahan mao si WBC Asia ug IBO Intercontinental flyweight champion Raymond Tabugon (16-3-1, 3KOs) sa Sanman Stable nga makigsinukliay og kumo ni Jong Sabellina sa walo ka hugna ubos sa super flyweight division. Sa lain pang kulbahinam nga supporting bouts, si Rimar Metuda (7-0, 3KOs) sa Sanman ug Jason Tinampay (6-1) sa Edgar Ricafort Stable sa Bohol mag-ilog sa bakanteng WBF Asia Pacific featherweight title, samtang si WBC Asian Boxing Council Continental featherweight champion John Vincent ‘Mulawin’ Moralde (13 wins, 7KOs) makigtakus ni Jerry Castroverde (6-1-0) sa Cebu’s Omega Boxing Gym.
Ang maong higanteng promosyon gipasiugdahan sa Sanman Promotions nga gipangulohan nilang Jim Claude Manangquil, Dexter Tan ug John Ray Manangquil. Gipaluyohan kini sa Gaisano Mall Atrium-GenSan, Mount Sabrina Resort, San Marino Tuna ug Sydney Hotel General Santos. (BANAT NEWS)
- Latest
