Laing 4 ka Pinoy abante sa Final 64 sa World 9-ball
CEBU, Philippines – Dugang upat pa ka mga Pinoy nga gipangulohan sa beteranong Sugbuanong tirador nga si Warren Kiamco nga miabante ngadto sa Final 64 sa World 9-ball Championship didto sa Al Arabi Sports Club Sports Club sa Doha, Qatar.
Nakigduyog ni Kiamco ngadto sa sunod nga hugna sa torneyo mao sila si Oliver Medenilla, Johann Gonzales, ug Lee Van Corteza.
Sa kinatibuk-an, siyam na ka mga Pinoy ang nakaangkon og luna sa knockout stage gumikan kay nag-una na man daan silang Carlo Biado, Dennis Orcollo, Antonio Gabica, Jeff Ignacio, ug Raymund Faraon.
Atol sa gitawag nga ‘Judgement Day’ niadtong Martes sa gabii, sila si Kiamco, Medenilla ug Gonzales midaog batok nilang Shannon Ducharme sa Canada, Vegar Kristiansen sa Normay ug Chang Jun Ling sa Chinese-Taipei sa managsamang iskor nga 9-6, samtang si Corteza mipakaging ni Tom Teriault sa Canada, 9-2.
Apan wala’y suwerte sila si Kiamco ug Faraon mag-unay sa sunod nga hugna, ingon man sila si Biado ug Corteza. Hinuon ang uban nilang kababayan makigharong og laing kontra nga naglangkob nilang Gonzales batok Akagariyama Yukio sa Japan, Ignacio batok Jason Klatt sa Canada, Gabica batok Ruslan Chinakhov sa Russia, Medevilla batok Karol Skowerski sa Poland ug Orcollo batok Mishel Turkey sa Qatar.
Mitanyag og kinatibuk-ang ganti nga $200,000 diin ang makampiyon mobulsa’g $30,000 (P1.3 million), samtang ang runner-up makadawat og $15,000. (BANAT NEWS)
- Latest
