Bernaldez moaway sa Japan karon
CEBU, Philippines – Isugal ni undefeated ALA Boxing Gym prospect Mark ‘Machete’ Bernaldez (15-0, 10KOs) ang iyang limpiyong rekord sa iyang pakigharong ni Japanese Tyuyoshi Tameda (11-1, 9KOs) karong gabii didto sa Korakuen Hall sa Tokyo, Japan.
Sa labing una niyang away sa gawas sa nasud, ang 23-anyos nga si Bernaldez laraw nga moiskor og impresibong kadaugan aron mahayagan ang iyang kahigayonan alang sa OPBF featherweight title fight nga kasamtangang gihuptan ni Japanese Hisashi Amagasa.
Ang Cebuano knockout artist lab-as pa sa iyang dominanteng ‘unanimous decision’ nga kadaugan batok ni Cristian Abila niadtong Nobiyembre 23 didto sa Dumaguete City.
Si Bernaldez nakasangka na og mga lig-ong kontra sama nila ni Indonesian Marangin Marbun, Arief Blader, Thai Khunkhiri Wor Wisaruth ug former PABA champion Marvin Tampus.
“We expect not only a win but an impressive victory for Mark,” matud pa ni ALA head trainer Edito Villamor. “This will surely test his skills and a win will open up bigger opportunities for him in the future including a regional title shot.”
Sa iyang bahin, human sa iyang ‘technical draw’ batok ni Pinoy Jimmy Paypa niadtong 2013, si Tameda aduna na’y duha ka sunod-sunod nga daog ug ang katapusan niyang biktima si Takenori Ohashi sud lang sa usa ka hugna. (BANAT NEWS)
- Latest
