PBA players duwa sa UV-Samsam Gullas team

CEBU, Philippines - Pagtan-aw pa lang daan sa ilang line-up seguradong makapakurog na sa tuhod sa ilang mga kontra.

Sa tinguha nga mahatagan ang iyang mga constituents sa unang distrito sa Sugbo labi na sa Minglanilla og usa ka eksplosibong aksiyon sud sa korte, si Kongresista Gerald Anthony ‘Samsam’ Gullas  Jr. miporma og usa ka lig-on kaayong line-up nga gilangkuban og mga bitoon sa PBA alang sa ikawalong edisyon sa  Emil’s Cup Open Basketball Tournament nga misikad kagabii didto sa Lipata Sports Complex.

Nangu sa makalisang nga puwersa sa University of the Visayas-Team Samsam Gullas mao ang aktibong mga PBA players nga sila si Ronald Joseph Quiñahan sa Rain or Shine Elasto Painters, Brian Quinton Heruela sa Blackwater Elite, Eliud Poligrates ug Mark Anthony Andaya sa KIA Carnival, Leomar Najorda sa Red Bull Barako, Rudy Lingganay ug Jeckster Apinan sa NLEX Road Warriors ug Jaypee Belencion sa GlobalPort Batang Pier.

Moduwa uban kanila mao ang kanhi mga pro nga sila si Jonathan Fernandez sa Purefoods (Star Hotshots na karon) ug Reed Friar Juntilla sa Red Bull.

“Lisud kaayo ang pagporma og team nga pulos PBA players, pero amo ning gihimo kay gusto ni Boss Samsam (Gullas) nga hatagan ang mga fans sa Minglanilla ug silingan niining lungsod og talagsaon nga duwa, kana bang once-in-a-lifetime basketball experience,” matud pa ni Van Halen Parmis, ang head coach sa team nga giyukboan sab nga usa sa labing tang-an nga commercial coach sa Kabisay-an ug Mindanao.

Ang usa ka semana nga torneyo  nakaagni og lima ka commercial clubs. Lain pang mokumbati mao ang Abrenica Engineering, RMA Logistics, SG Merchandising ug Aspa.

Ang makampiyon mobulsa og P110,000, samtang ang mopahiluna sa ikaduha hangtod sa ikaupat nga dapit mobulsa og P50,000, P30,000 ug P15,000.