Crox2 kampiyon sa Pusok sa Tanduay Paliga 5-on-5

CEBU, Philippines – Yano kaayong gilubong sa Crox2 Warriors ang ilang karibal nga Sparx team sa iskor,  85-65 aron sakmiton ang titulo sa Tanduay Paliga 5-on-5 didto sa barangay Pusok gym sa dakbayan sa Lapulapu.

Walo lang ka teams ang gidapit sa mga tigpasiugda sa maong torneyo  nga ilang gihagpatan og maayo sumala pa sa representante sa technical ug rules committee nga si Rey Canete.

Ilang gilusad pag-usab karong tuiga ang Tanduay 5-on-5 nga paliga sa barangay tungod sa malamposong torneyo sa miaging tuig.

Gibuksan dili pa lang dugay ang second season didto sa barangay Labangon diin upat ka teams ang nagtinaktakay sa inter-barangay  ug ang overall champion sa maong torneyo mailhan na unya sa buwan sa Mayo.

Ang barangay Labangon girepresentahan sa sitio Fatima (sakop sa barangay Duljo-Fatima) human ilang gipalagpot ang sitio Sambag kaniadtong Marso 7.

Ang maong torneyo bukas sa tanan mga molupyo sa ilang tagsa-tagsa ka barangay nga nagpangedaron og 18 anyos pataas.

Karong semanaha, ang torneyo mitapon didto sa barangay Pusok sa dakbayan sa Lapu-Lapu alang sa lain na sab nga elimination games.

Ang maong torneyo gipaluyohan ug gipasiugdahan sa MCI- Tanduay branch ug sa Tanduay Distillers Inc. ug gidumala sa Samahang Basketbol ng Pilipinas (SBP) nga maoy opisyal nga referees.

Ang tulo ka leading scorers sa Crox2 Warriors mao silang Saga (27), Crudad (15), ug Pajares (10) samtang ang tulo ka mga topscorers sa Sparx mao silang W. Almallas (16,) R. Almallas (12) ug Pepito (10).