Red, Green nidaog na
CEBU, Philippines – Nakatilaw na gyud og daog ang Red ug Green teams sa SRP Sunday Club Summer League 2015 basketball tournament niadtong Domingo didto sa San Roque Parish gym sa Brgy. Subangdaku, Mandaue City.
Ang Red team mipilde sa Black sa iskor nga 62-58, samtang ang Green team nakalingkawas sa laang sa White, 50-48.
Tulo ka players sa Red ang miiskor og double figures sa pagpangulo ni Arnel Colanse pinaagi sa iyang 13 puntos, samtang sila si Paul Miñoza ug JR Migallen parehong miamot og 11 puntos.
Human sa panagtabla, 15-all sa first period, ang Red mao na ang naggukod ug didto na kini nakalabaw og balik sa nahabiling 2:10 sa final quarter, 56-55 ug wala na kini molingi pa sukad niadto.
Sa laing bahin, puwerte sab lipaya sa Green team human nila maangkon ang labing una nilang daog sud sa upat ka duwa.
Biya ang Green sa sayong bahin sa second period, 21-15, apan si Melvin Abatayo mitusak og back-to-back baskets aron mosikit ngadto sa dos puntos, 21-19 ug nakahimo pa pagtabla, 21-all sa basket ni Zaldy Pescante sa nahabiling 4:00 minutos sa maong kuwarter.
Hinuon, nainat sa White ang ilang labaw, 36-28 sa itsa ni Alex Cabase. Misikit pag-usab ang Green hangtod nga ilang nailog ang daog.
Bugtong si Benjie Pelarios mao lang ang nakaiskor og double figures sa maong duwa pinaagi sa iyang 11 puntos.
Ang Red, Green ug Black parehong nagbitbit og 1-3 win-loss records, samtang ang White adunay 2-2 nga baraha.
Puntos Matag Usa
Unang duwa:
RED (62) – Colanse 13, Miñoza 11, Migallen 11, Villarin 8, Amora 7, Survilla 4, Castro 4, Dy 2, Arreglo 2.
BLACK (58) – Tumongha 10, Medio 10, Leocario 9, Povadora 9, Llanos 8, Lauron 4, Mejares 3, Benson 3, Narte 2.
Ikaduhang duwa:
GREEN (50) – Pelarios 11, Abatayo 8, Gingco 6, Mercader 4, Dandan 4, Menaling 3, Atillo 2, Miñoza 2, Pescante 2, Simbajon 2, Laurente 2, Dialogo 2.
WHITE (48) – Obijanda 7, Abaño 7, Cuala 6, Miñoza 6, Baloro 4, Rubia 4, Alvarado 3, Cabalquinto 3, Argo 2, Hucamis 2, Cabase 2. (BANAT NEWS)
- Latest
