Barako ug Meralco magtigi sa Minglanilla karon

CEBU, Philippines - Human sa ilang sangka didto sa Leyte, ang aksyon sa hardcourt motapon didto sa Minglanilla karong adlawa sa pagpadayon sa Cebu-Leyte Cup diin magtigi ang Barako Bull Energy Cola ug Meralco Bolts didto sa Minglanilla Sports Complex.

Ang Barako Bull ug Meralco magsangka sa alas-9 sa gabii human sa opening game tali sa Samsam Gullas-Panalay Tailoring ug Goldstar Hardware sa alas-7 sa gabii.

Ang Barako Bull ug Goldstar pulos naglaraw og daog aron magpabilin ang ilang paglaum nga mokampiyon sa maong charity basketball tournament alang sa mga biktima sa Yolanda survivors.

Ang Barako Bull mipukan sa Samsam Gullas team, 61-52, samtang ang Goldstar mirehistro og usa ka upset nga kadaugan batok sa Barangay Ginebra San Miguel, 90-87 niadtong Huwebes didto sa Hinundayan, Leyte.

Ang Goldstar magsalig ni former University of the Visayas (UV) import nga si Mike Harry Nzesseu uban nila ni ex-PBA players Leomar Losentes ug Marlon Basco.

Ang  Samsam Gullas squad gibidahan ni Steve Akomo uban sa suporta nila ni Ramsey Williams, Christian Sentheu, Jean Jacques Manga ug Emmanuel Ojuola. Anaa usab sila si Ferdinand Lusdoc, Harold Cincoflores, Jovanie Aguilar, Patrick Cabahug, Reed Friar Juntilla, Jayford Rodriguez ug Ronaldo Bucao.

Sa PBA duel, ang Barako Bull langkuban nila ni Chico Lanete, JC Intal, Nico Salva, Dennis Miranda, Mick Pennisi, Jondan Salvador, William Wilson, Ryan Garcia, Jeric Fortuna, Carlo Lastimosa, David Marcelo, Leomar Najorda ug Elvin Jake Pascual.

Samtang ang Meralco ni coach Norman Black mosandig nila ni Mike Cortez, Reynel Hugnatan, Rey Guevarra, Clifford Hodge, James Ryan Sena, Wilfredo Vizcarra, Niceforo Pagobo, Joeriz Clemente, Magdalino Martin ug John Marion Wilson.

Ang finale sa lima ka adlaw nga duwa adto sa Mandaue City Cultural and Sports Complex ugma diin ang Goldstar ug Barako Bull magtigi sa alas-4 sa hapon, sundan  sa duwa tali sa Ginebra ug Meralco sa alas-6 sa gabii.

Ang mga tiket nagkantidad og P150 sa upper box, P250 sa stage, P500 sa ring side sa mga duwa sa Minglanilla, samtang  P200 sa upper box, P400 sa stage, P500 sa lower box ug P700 sa ring side sa Mandaue games.

Mapalit ang mga tiket sa New Reroma Pharmacy sa Poblacion Ward 1 sa Minglanilla, Bigstart Travel assistance sa Robinsons-Talisay, Cebu Coliseum ug sa The Old Spaghetti House sa SM City-Cebu.