Sugdan na ang aksiyon sa Milo Little Olympics 2014

CEBU, Philippines -  Seryoso ang  University of Cebu (UC) sa ilang tinguha nga makuha pagbalik ang korona sa Visayas leg sa 19th Milo Little Olympics nga sugdan karon sa managlahing binyu.

Ang UC maoy naghari sa qualifying leg sa Milo Olympics sud sa 17 ka higayon, apan  napakgang kini sa University of San Carlos (USC), ang over-all champion sa miaging tuig.

Sayod ang USC nga buhaton sa UC ang tanan aron mailog pagbalik ang korona gikan kanila ug nakita nga mahimong hugot ang ilang panagribal sa elementary ug secondary competition sa Milo Olympics.

Hinuon, si USC athletic director Fr. Adriano Ocariza, SVD nagkanayon nga salig siya sa preparasyon sa mga atleta sa USC nga makahimo og back-to-back championship bisan pa sa dautang laraw sa UC.

Ang 19th Milo Little Olympics  gibuksan na kagahapon, apan ang mga duwa karon pang adlawa sugdan.

Atol sa maong seremonyas, si Megan Fe Heeger sa Bright Academy ug Maria Mercy Bacarisas sa Colegio del Santo Niño maoy napiling  “Miss Milo Little Olympics” sa tagsa-tagsa nila ka dibisyon.

Gawas sa USC ug UC, lain pang 126 ka tunghaan sa elementarya ug laing 115 sa sekondarya ang mopadala sa ilang mga atleta.

Sa laing bahin, ang gymnastics department mipahibalo nga aduna sila’y usbon sa points system pagtino sa mananaug, samtang ang football mogamit og 9-a-side format lahi sa naandang 11-a-side sa elementary level.