Mandaue JCC nanghawod sa tuburan chess tourney

CEBU, Philippines - JCC nga gibitoonan ni Eden Diano nagtabla uban sa Mandaue-Labogon sa final round, 2-2,  apan ang nahiuna maoy milangkat sa championship sa 1st Tuburan Inter Municipalities and Cities Chess Team Tournament niadtong weekend didto sa Cebu Technological University (CTU)-Tuburan Campus Activity Center.

Si Diano ug iyang kauban nga silang Rommel Ganzon, Diego Claro ug Harold Diano mitapos sa 5-round Swiss system competition bitbit ang 8.-0 puntos nga igo na kaayo alang kanila pagbulsa sa grand prize nga P30,000.

Ang Toledo City, host Tuburan-A ug ang Mandaue- Labogon nagtabla nga adunay 7.0 puntos  matag usa, apan ang  Toledo nga gibitoonan nilang Glen Pardillo, Bonn Tibod, Christopher Tubalado ug Jerome Cabantan maoy misakmit sa ikaduha pinaagi sa superior

tie-break output.

Ang Tuburan-A nilang Voltaire Sevillano, Carlos Moreno III, Rhenzi Kyle Sevillano ug Esio Gelito mi-okupar sa ikatulong dapit, gisundan sa Mandaue-Labogon nga gilangkuban nilang Ramsey Pedrosa, Leonardo Alidani, Reynaldo Flores ug Bhel Ortiz.

Gibulsa sa Toledo ang P20,000 nga ganti, samtang ang Tuburan-A nakaangkon og P10,000 ug ang Mandaue-Labogon nakadawat og P6,000.

Ang Lapu-Lapu City nga gimaneho nilang Aldwin Daculan, Allan Pason, Kraig Quinain ug Mark Cimafranca mipahiluna sa ikalima nga dapit, samtang ang Argao LGU nilang Michael Pagaran, Yves Fiel, Hector Villamora ug Percival Fiel mikompleto sa top six finishers.

Ang top individual performers nakadawat sab og mga insentibo ug kini naglakip nilang Merbel Roque sa Dalaguete  alang sa Board 1, Allan Pason sa Lapu-Lapu City ug Rommel Ganzon sa Mandaue JCC sa Board 2, Kyle Sevillano sa Tuburan-A sa Board 3 ug Esio Gelito sa Tuburan-A ug Harold Diano sa Mandaue JCC alang sa Board 4.

Ang duha ka adlaw  nga kompetisyon nahimong posible pinaagi sa walay puas nga suporta sa lokal nga kagamhanan sa dakbayan sa Tuburan ubos sa liderato ni Mayor Democrito 'Aljun' Diamante ug   iyang igsuon nga si Vice Mayor Danny Diamante.

Ang mga duwa gidumala nilang FIDE Arbiters Marvin Y. Ruelan ug Bob Tojong sa abag nilang CPA Rodrigo Ababat ug Tony Cabibil.