USPF teams gi-disband
CEBU, Philippines - Dili tiaw ang kakurat ug kabalaka sa mga magduduwa sa University of Southern Philippines-Foundation (USPF) dihang gipahibalo sa mga tagdumala sa maong unibersidad nga "gi-disband" ang teams niadtong miaging bulan.
Sa usa ka memorandum nga gipetsahan og Nobiyembre 19, 2013 ug gi-address ngadto sa mga players, si USPF Vice President For Finance Rolando L. Villa miingon nga ila na nga "gi-disband" ang maong team pipila ka adlaw gikan sa pagkahuman sa Cebu Schools Athletic Association (CESAFI) diin usa ang Panthers sa mga orihinal nga miyembro.
Hinuon, gitataw ni Villa nga ang pagka-disband walay kalabotan sa ilang pagkapilde sa CESAFI season niadtong Oktubre.
Sa maong suwat, si Villa miingon nga ilang gitugotan ang mga graduating players sa pagpailawom lang gihapon sa scholarship hangtod sa buwan sa Marso.
Matud pa ni Villa nga anaa pa sila karon sa "process of re-assessment" ug ila pang tun-an og maayo kun mobalik ba sila alang sa 2014 CESAFI season.
Lakip sab ang mga players ug coaches sa high school department ilang gipang-release ug ipatawag ra unya’g balik kun makahukom na sila pagporma og team alang sa umaabot nga CESAFI season.
Lain suwat gikan kang Mrs. Lourdes D. Jereza, ang Vice-President for External Relations nga gipetsahan og Nobiyembre 20, 2013 nagkanayon nga ilang gituman ang hangyo sa mga players nga lugwayan ang scholarship hangtod sa Marso 2014. (BANAT PALARO)
- Latest
