Prime Asia vs. San Marino karon

CEBU, Philippines - Naangkon sa San Marino Tuna-CIT-U ang ikaduhang luna sa finals human ilang gipukan ang Cebu Landmasters sa iskor, 76-61 kaniadtong Martes sa gabii ug maoy makigsangka batok sa Prime Asia Lending Corp.-UV alang sa best-of-three finals series sa nagpadayon nga Enervon CESAFI Partner's Cup didto sa Cebu Coliseum.

Ang Game 1 sa best-of-three finals sugdan karong gabii.

Ang Gaisano Capital South-UC kinsa napilde sa Prime Asia, 65-76, makigtakos batok sa Cebu Landmasters alang sa ikatulong pwesto sa usa ka knockout game.

Mao na kini ang ikaduhang higayon nga makigsangka ang Prime Asia sa finals batok sa team nga gilangkuban sa CIT-U tungod kay sila sab maoy nag-ilog sa korona sa miaging tuig dihang maoy ilang sponsor ang KIA Motors.

Nagmangtas na sab si Joshua dela Cerna kinsa maoy nangu sa San Marino sa iyang 29 puntos.

Gawas nga nag-igo sila'g maayo sa ilang mga tirada, hugot sab kaayo ang depensa sa San Marino dihang ilang gipugngan ngadto sa nuybe puntos ang Cebu Landmasters sa second quarter aron molabaw og 21 puntos atol sa halftime, 45-24.

Misuway pagsikit ang Cebu Landmasters didto sa fourth period dihang mihimo sila'g 6-0 run ug nabiyaan na lang sila'g 10 puntos, 46-56.

Hinoon, kanunay adunay sukli ang San Marino ug dali sab miburot pagbalik ang ilang labaw ug wala na makaapas ang Cebu Landmasters human sa mainitong panapos nga 11-0  run nga naglakip sa usa ka three-pointer ni Alan Dimco ug pabiling 21 puntos ang labaw, 67-46 ug may 6:45 pa ang nahibiling oras sa duwa.

Miamot og 12 ug 11 puntos matag usa silang Dimco ug  Vincent Menguito alang sa San Marino.

Si Stephen Que maoy nangu sa Cebu Landmasters sa iyang 15 puntos ug midugang ang Cameroonian import nga si Ahmed Salihou og 12 puntos nga maoy iyang average ug miabuno si Ian Ortega og 10 puntos. 

Wala hinoon makahuygo ug maayo silang Charles Pepito ug Nico Magat alang sa Cebu Landmasters.  

Sa sayo pa, miposa og 20 puntos si John Michael Abad aron pangulohan ang  Prime Asia samtang si Jan Auditor maoy nangu sa Gaisano sa iyang 22 puntos.

Puntos matag usa:

First Game:

Prime Asia-UV (76): Abad 20, Enciso 17, Perolino 7, Mendoza 6, Codilla 4, Fajardo 3, Escocio 3, Cabañero 3, Akomo 3, Babia 3, Soliva 2, Marquez 2, Octobre 2,  Santillan 1.

Gaisano-UC (65): Auditor 22, Noah 15, Tamparing 7, Quintao 6, Ampoon 6, Sigasig 4, Cabrera 3, Montilla 2.

Second Game:

San Marino-CIT-U  (76):       Dela Cerna 29, Dimco 12, Menguito 11, Taboada 7, Pono 5, Batiquin 4, Eboña 2, Brigoli 2, Tabalin 2, Graf 2.

Cebu Landmasters-USC (61):  Que 15, Salihou 12, Ortega 10, Rabat 8, Pepito 8, Laude 2, Bensig 2, Magat 2, Guardiario 2.  (BANAT NEWS)