Panagdait, Greenhills kampiyon

CEBU, Philippines -  Nasakmit sa Panagdait ug sa Greenhills Subdivision ang kampiyonato sa ilang tagsa-tagsa ka category sa adult open ug ingon man sa teens under 19 category sa HoopStar’s Lord of the Rings—Battle of the Villages kaniadtong Sabado sa gabii didto sa J Centre Mall.

Gibukbok sa Panagdait ang Summerville sa iskor, 92-79 aron sakmiton ang korona sa adult open category samtang gilatos sa Greenhills ang St. Paul College sa iskor, 108-92. Pareho nilang gitapos ang best-of-three championship series sa 2-0 nga baraha.

Gibulsa sa Panagdait ang maanindot nga championship trophy ug ganting cash nga P15,000 mil alang sa adult open category samtang miuli nga nagbitbit og P10,000 mil ang Greenhills alang sa teens category.

Ang mga team captains sa champion teams nga silang Jan Ponz Geraga sa Panagdait ug si Wisdom Ceniza sa Greenhills, maoy napiling Most Valuable Player (MVP) sa tagsa-tagsa nila ka dibisyon.

Ang kahaniti sa ilang playmaker nga si Ranil Cortes maoy nahimong instrumento alang sa kadaugan diin mihakot siya’g 28 puntos ug si Geraga midugang og 16 puntos.

Ang laing mga players nga misubang alang sa Panagdait mao silang Carlo Camacaylan kinsa miposa og 14 puntos, Jerome Balansag sa iyang 11 puntos ug si RJ Dinolan sa iyang 10 puntos.

Ang Summerville Drillers point guard nga si Jeff Cleopas mihakot og 21 puntos aron pangulohan ang ilang pakyas nga kampanya samtang si Niño Tidoy miabuno og 17 puntos. Dismayado kaayo kalabot sa officiating si Cipriano Franco kinsa na-fouled out may 5:50 ang oras sa fourth quarter human siya mobahug og 14 puntos.

Sa 19-under game, miburak og 30 puntos si Mark Kong aron pangulohan ang Greenhills.

Mibahug og 13 puntos si Kong sa third quarter aron duslitan ang ilang 10-0 run ug si Leeh Suico misuway pagsalbar sa Bakilid dihang mihimo kini’g 10 puntos sa fourth period ug maoy nangu sa iyang team sa iyang 23 puntos.

Puntos matag usa:

First Game:

Panagdait (92) – Cortes 28, Geraga 16, Camacaylan 14, Balansag J 11, Dinolan 10, Tecson 7, Laurente 4, Maano 2.

Summerville (79) –Cleopas 21, Tidoy 17, Cipriano 14, Virtucio 9, Gabasa 8, Villarta 6, Ares 2, Gahi 2.

Second Game:

Greenhills (108) – Kong 30, Aloro 20, Ceniza 19, Iboña 15, Montesclaros 9, Espina 7, Armilla 3, Regner 3, Caballes 2.

Bakilid-SPC (92) –Suico 23, Jayme 21, Fuentes 14, Iglesia 10, Batiancila 4, Bayate 4, Bohol 4, Magale 4, Olympia 4, Sanchez 4. Quarter scores: 16-26; 35-23; 29-17; 28-27 (GGM)