Nawanao Block, 2-0 na

CEBU, Philippines - Milansang sa ilang ikaduhang sunod-sunod nga daog ang Nawanao Block dihang ilang gilumsan ang Riverside-A, 44-33 sa seniors division sa nagpadayong aksiyon sa Barangay Subangdaku Palarong Pambarangay 2012 niadtong Lunes sa gabii didto sa Wireless Cultural/Sports Complex sa maong malambuon nga barangay sa Mandaue City.

Nagtambayayong silang Jongjong Canseco, Raffy Amora ug Elmer Laurente aron hatagan ang Nawanao Block og 18-4 nga bentaha paghuman sa unang 10 minutos sa duwa.

Imbes maluya sa kalawom sa lubong, ang Riverside-A wala kawad-i og paglaum ug padayon nga nakigbisog hangtod nga nahilis ang makalumos nga labaw. Gani ila pa nga napatabla ang iskor, 22-all sa lay-up ni playmaker Stephen Danes sa nahabiling 6:25 sa third period.

Apan didto ra kutob ang ilang kaagresibo kay ang Nawanao Block misukli og upat ka sunod-sunod nga puntos aron makuha pagbalik ang momentum.

Mihulga sa katapusang higayon ang Riverside-A sa iskor nga 26-27 human sa basket ni Lolor sa nahabiling 52 segundos sa third quarter.

Miabot ang kalbaryo sa Riverside-A dihang migradwit si Danes sa katapusang 4:38 sa duwa nga nakahatag og higayon sa Nawanao Block pag-inat sa ilang labaw hangtod nga nahurot ang oras sa duwa.

Bugtong si Canseco lang ang mipugnit og double figures sa iyang 15 puntos aron pangulohan ang Nawanao Block. Si Amora mitimbre og otso puntos, samtang si Laurente mitimang og siyete puntos ug si Johnlie Montayre, kinsa mitabang sab pag-inat sa labaw sa Nawanao Block miariya og duha ka triples alang sa iyang sayes puntos.

Ang naparot nga Riverside-A gipangulohan nilang Danes ug Marlo Tecson nga mitusak og nuybe puntos matag usa.

Ang tinuig nga Palarong Pambarangay namugna pinaagi sa mga paningkamot ni tournament chairman Brgy. Capt. Ernie N. Manatad uban sa abag ni Hon. Rene C. Tecson (co-chairman) ug Ramon C. Fontanosa (sports coordinator/secretariat). Mga reperi naglakip ni Harry Espante, Mamy Puzon ug Henry Fontanosa.

Puntos Matag Usa

NAWANAO BLOCK (44) - Canseco 15, R. Amora 8, E. Laurente 7, Montayre 6, R. Laurente 2

RIVERSIDE-A (33) - Danes 9, Tecson 9, Batara 6, Conde 3, Cortes 2, De Guzman 2, Lolor 2 (BANAT NEWS)