Solar Spikers nakatutok sa ika-2 sunod
MANILA, Philippines — Puntirya ng Capital1 Solar Energy ang ikalawang sunod na panalo, habang ang makasampa sa win column ang hangad ng ZUS Coffee sa 2026 Premier Volleyball League (PVL) All-Filipino Conference Siklab leg sa MOA Arena sa Pasay City.
Lalabanan ng Solar Spikers ang Thunderbelles ngayong ala-1 ng hapon, habang magtutuos ang PLDT High Speed Hitters at Akari Chargers sa alas-6 ng gabi.
Nagmula ang Capital1 sa 28-26, 22-25, 25-15, 23-25, 21-19 pag-eskapo sa Akari para makabangon sa naunang 25-22, 25-18, 17-25, 20-25, 8-15 pagtiklop sa Choco Mucho.
Kabiguan ang kaagad natikman ng ZUS Coffee sa kanilang unang laro matapos ang 20-25, 17-25, 20-25 pagyukod sa Choco Mucho.
“Our morale is high. But the important part is we need to adjust how we play because what I know about the Thunderbelles is they’re playing really good, really fast, and coach Jerry (Yee) is always very good, so we’re gonna be ready for them,” ani Brazilian coach Jorge Souza de Brito ng Solar Spikers.
Muling aasahan ng Capital1 sina Bella Belen, Vanie Gandler, Erika Santos, Pauline Gaston, setter Juju Coronel at rookie libero Detdet Pepito.
“Siguro, sa mindset ko na rin as a player, kasi every time maglalaro ako with my team, lagi kong iniisip kung paano ko mai-improve ’yung game ko,” sabi ni Belen sa paghataw niya ng career-high 35 points laban sa Akari.
Itatapat ng ZUS Coffee sina Jolina dela Cruz, Cess Robles, Chinnie Arroyo, Kate Santiago, Fiola Ceballos, Zam Nolasco, AC Miner, Riza Nogales at Chai Troncoso.
- Latest
