Junior Altas pasasabugin Light Bombers

MANILA, Philippines — Pupuntiryahin ng University of Perpetual Help System DALTA ang pang-walong sunod na panalo sa pagsagupa sa Jose Rizal University sa final crossover match ng NCAA Season 102 juniors basketball tournament.

Nakatakda ang duwelo ngayong alas-12 ng tanghali sa FilOil Arena sa San Juan City.

Hawak ng Light Bombers ni coach Juan Miguel Martin ang liderato sa bitbit na 8-0 record kasunod ang Junior Altas ni mentor Joph Cleopas na may 7-1 baraha tampok ang seven-game winning streak.

Muling aasa si Cleopas, gumiya sa Perpetual sa NCAA Season 100 title, kina Louie Rosales, Sizco Roquid, Brina Orca Jr., Sam Villaruel, Lord Dulanas, and point guards Kakai Zamoras at Kurt Patalinghug.

Magbibigay din ng suporta sina Francis Rosales, Vandolf Urdaneta, Raymark Maday, Arkin Cristobal, Josh Saga at John Restificar.

Ihaharap ng Jose Rizal sina Lorenz Cinco, Paul Navera, Johnlord Cruz, James Manlapaz at Luis Lugtu.

Nagmula ang Light Bombers sa 62-61 pagtakas sa defending champions Letran Squires, habang sinuwag ng Junior Altas ang Mapua Red Robins, 62-60, sa kani-kanilang huling laro.