Smart Gilas vs. qatar

 CEBU, Philippines - Isip preparasyon sa nagsingabot nilang kampanya sa FIBA Asia Cup, ang Smart Gilas Pilipinas gitakdang moduwa og usa ka tune-up game karong Septiyembre 8 batok sa Qatar.

Kini ang gipahibalo ni head coach Chot Reyes kinsa nagkanayon nga gisugdan na nila ang todo ensayo alang sa ilang pagsalmot sa 4th FIBA Asia Cup nga gitakda sa Septiyembre 14 ngadto sa 22 didto sa Tokyo, Japan.

Si Reyes namahayag nga human sa ilang selebrasyon sa kampiyonato sa 34th William Jones Cup, sugdan na sa national team ang ilang seryosong preparasyon batok sa mga power-house team sa Asya. Ang mogawas nga top 4 team sa maong torneyo maoy moabante sa 2013 FIBA Asia Championship didto sa Lebanon.

Ang Qatar usa sa mga lig-ong koponan sa Asya ug nagtuo si Reyes nga makatabang ang ilang tune-up game batok sa maong koponan aron madugangan ang kasinatian sa koponan paingun sa Asia Cup.

Gawas sa Qatar, laing mga lig-ong koponan nga muhatag og lisud nga hagit sa Pilipinas mao ang Iran, China, Lebanon ug Japan.