Blue, Green naka-upset sa PDBC caging

CEBU, Philippines - Gipangpilde sa Blue ug Green teams ang lig-on nilang kaatbang sa ikaduhang hugna sa eliminasyon sa Power Dealer Basketball Club (PDBC) 2011 Inter-color cagefest niadtong Sabado didto sa Sacred Heart School gym sa dalan General Maxilom Avenue, ning siyudad.

Ang Blue team nga gipaluyohan sa ABCD Byrhon Merchandise mipakurat sa Red team nga gipaluyohan ni Cris Uy, 58-45 ug gipakuratan sab sa Green team nga gisuportahan sa Natasha/MSE ang White-Blackwater ubos ni Canjo Fernandez, 53-46.

Nilabaw la'g gamay ang Blue ni coach Gerry Augusto sa opening period, apan kalit silang nanginit sa second quarter pinaagi sa 16-6 run aron moposte’g 13 puntos nga abante, 30-17 luyo sa paningkamot sa ilang team captain Flor Sayson.

Mas nagmangtas pa gyud ang Blue didto sa final half hinungdan nga wala na makasikit ang Red.

Bisan pa sa ilang kapildihan, ang Red nakabentaha gihapon sa baraha nga adunay 4-3, samtang ang Blue nagbitbit og 2-4 win-loss record.

Si Sayson mi-iskor og 24 puntos aron pangulohan ang Blue, samtang si Clint Suelto mao sab ang nangu sa Red nga adunay 21 puntos.

Sa laing bahin, si Marlon Bernaldez maoy nangu sa 2-4 nga Green team human mihakot og 12 puntos, laing tulo niyang teammates mi-iskor sab og double figures.

Si Marcial Fernandez, kinsa miposa og 17 puntos maoy nangulo sa White nga nagbitbit og 4-2 nga baraha. Laing Fernandez nga si Canjo miamot og 15 puntos.

Puntos Matag Usa

Unang duwa:

BLUE (58) - Sayson 24, Maboles 8, Sagario 7, Retuya 5, A. Castolo 5, N. Castolo 5, Rotersos 4

RED (45) - Suelto 21, Mejias 10, Uy 6, Patiluna 6, Pepito 2

Ikaduhang duwa:

GREEN (53) - Bernaldez 12, Laborte 11, Tabique 10, Galendo 10, Mercado 6, Horales 2, Magtagad 2

WHITE (46) - M. Fernandez 17, C. Fernandez 15, Romares 8, Bonifacio 4, De Paula 2 (BANAT NEWS)