R.A. Essential abante sa semifinals

CEBU, Philippines - Hingpit na nga misulod sa semifinals ang R.A. Essentials ni team owner Ric Bastida ug coach Jojo Pada dihang ilang gipukan ang Dumlog Talisay Selection, 113-108 sa katapusang duwa sa elimination sa Barangay Cuanos, Minglanilla Fiesta Cup 2011 basketball tournament didto sa Cuanos covered court sa lungsod sa Minglanilla, Cebu.

Sayo kaayong mipabuhagay sa ilang kainit ang R.A. Essentials sa pagpangulo ni kanhi UV Lancer Rene Toring uban sa kanhi pro cager nga si Danny Aying.

Ang R.A. Essentials mikulit og 92-82 nga labaw pagsugod sa fourth period, apan mi-rally ang Dumlog ug nakahigayon pa kini sa pagtabla sa duwa, 104-all sa katapusang dos minutos.

Nailog hinuon og balik sa R.A. Essentials ang labaw ug wala na nila hatagi pa og higayon nga makasikit pa ang Dumlog.

Sila si Jerome Villaver, Dong Booc ug Jasper Villaver maoy miduslit sa rally sa Dumlog .

Si Toring mihagdaw og 30 puntos aron pangulohan ang R.A. Essentials, samtang sila si Aying ug Rondyl Roncal miamot og 20 puntos matag usa ug si Julius Gastador mitampo og 19 puntos.

Nangulo sa Dumlog Selection mao si Jerome Villaver, kinsa mi-iskor og 31 puntos, gisundan ni Jasper Villaver sa iyang 16 puntos.  (BANATSPORTS)