Bautista, Ruiz nipirma na'g kontrata

CEBU, Philippines - Hingpit na nipirma og kontrata si ALA knockout artist Rey 'Boom Boom' Bautista ug ang mortal niyang kaaway nga si Heriberto Ruiz alang sa gikahinaman nilang "Pinoy Pride 6: Grudge Rematch" karong Hunyo 11 dinhi sa Sugbu.

Giisip kini nga labing dakung "rematch" tali sa Filipino boxer ug Mexican sa kasaysayan sa Philippine boxing, diin ang ALA knockout artist nga si Bautista laraw nga mobalos ni Ruiz, kinsa nidaog pinaagi sa "unanimous decision"sa una nilang sangka.

Panahon usab kini ni Bautista nga ipamatuod sa iyang   fans ug mga kritiko nga hingpit na siyang nahibalik sa iyang porma ug kusog human sa operasyon sa iyang walang kamot.

Si Bautista una nang namahayag nga personal gyud ang iyang kalagot ug tinguha nga pildihon si Ruiz.

"Pirme gyud nako gihuna-huna ang nahitabo sa among unang away nga iya kong gipadug-an. Ning higayona akong seguraduhon nga siya na usab ang mopato sa iyang dugo," matud pa sa garbo sa Candijay Bohol nga si Bautista. (BANATSPORTS)