CDU teams parehong miani og daog

CEBU, Philippines - Gipangpukan sa mga koponan gikan sa Cebu Doctors' University (CDU) ang tagsa-tagsa nila ka kaatbang sa 1st Alberto's Pizza Cup-Nursing Edition basketball tournament didto sa Our Lady of Sacred Heart Parish gym sa dalan Escario, ning siyudad.

Ang CDU Spartans milusad og bangis nga atake aron lat-an ang University of San Carlos (USC) Team B, 64-46, samtang ang CDU Nursery nangayo pa og overtime sa wala pa nila maangkon ang 75-70 nga kadaugan batok sa Southwestern University (SWU).

Kontrolado sa Spartans ang tibuok duwa human miposte og 21-8 nga labaw sa first period.

Sa main game, napapas ang dakung labaw sa SWU dihang si Nico San Juan miposa og 15 sa iyang 21 puntos sa fourth quarter ug overtime.

Sa laing bahin, ang Alberto's Pizza cagers moduwa na sab og laing exhibition game, ning higayona batok sa Rama Boys nga gipangulohan ni Cebu City Mayor Mike Rama ugma sa alas-6 sa gabii didto sa Capitol Parish gym.

Mokompleto sa line-up sa Rama Boys mao sila si Rene Toring, Danny Aying, Lito Navarro, Argel Magan, kanhi San Beda Red Cub Charlie 'The Slugger' Reyes, Aniñon ug Jun Babatid.

Ang Alberto's Pizza gilangkuban nilang Rafson Chua, Donny Kiamko, Sidney Kiamko, Heidi Prete, Bryan Climaco, Kent Tandan, Momon, Peter Rodriguez, Rady Alvarez, Mark Villagonzalo, Paul Alvarez, Ramil Labay, Mark Kasayan, Hans Grogaard, Iam Aparri ug Wilby Tan. (BANATSPORTS)