Binukbukay sa Countrymall

CEBU, Philippines - Makigpinaksitay sila si Christian Apawan sa University of the Visayas (UV) ug Rhiyan Canillas sa Toledo City sa ipahigayong Summit Natural Drinking Water Fight Night karong gabii didto sa Gaisano Countrymall carpark sa Brgy. Banilad, ning siyudad.

Managlahing kapalaran ang gidangatan sa duha ka boksidor sa miaging Summit Fight Night atol sa Sinulog, apan managsama sila nga pulos nagtinguha nga modaog batok sa usa'g-usa sa ilang sangka karon ubos sa 60 kgs. division.

Si Apawan laraw na sab nga mokulit og daog, samtang si Canillas malaumon nga makabangon human mapilde ngadto ni Mark Bernaldez sa Butuan.

Mo-away usab ang duha ka boksidor sa Phil-Australia boxing club nga sila si Bebe ug Richard Rama. Si Bebe moharong ni Jun Gabriel Besinga sa Banilad Elementary School, samtang si Richard makigsinukmagay ni Vicente Seos-e.

Ang produkto sa Cabancalan Elementary School nga si Polid Banal moaway batok ni Melmark Dignos sa Florencio Urot National High School, samtang si Kevin Jake Cataraja makigsinukliay og kumo ni Mart Kevin Soreno sa Flores Boxing Club.

Ang teammate ni Soreno nga sila si Michael Lopez ug Christian Bacolod mopakita sab og aksiyon batok sa mga Batang Lacion nga sila si Ritchie Montealto ug Jovan Munoz.

Mokompleto sa maong boxing card mao si Mardy Moana batok ni Jaime Tanawon, Jan Ivor Lastrilla batok Ryan Cagatulla ug Eleno Traya batok ni Rolando Reblenca. (BANATSPORTS)