Lite Shipping hari sa Guy Lim Cup

CEBU, Philippines - Miagi pa og kulba nga duwa ang Lite Shipping una nila maangkon ang 81-77 nga kadaugan batok sa Cebu Movers System (CMS) aron haruson ang duha ka duwa sa ilang "best-of-three" finals series ug ingon man pagsakmit sa korona sa Lucio 'Guy' Lim Sr. Memorial Cup basketball tournament diha sa City Sports Club-Cebu gym sa Cebu Business Park.

Naglawig na sab unta og laing sayon nga kadaugan ang Lite Shipping dihang milabaw sila’g 15 puntos sa sayong bahin sa first period, apan hinay-hinay nga mikamang ang CMS hangtod nga nailog ang labaw, 66-65 sa nahabiling tres minutos sa duwa.

Hinuon, dali kaayong nakarekober ang Lite Shipping ni team owner Niño Imboy ug misukli og krusyal nga mga puntos aron tablahon ang iskor, 70-all sa katapusang 2:40 sa fourth period.

Human niadto, giduslitan ni Eming Batarilan ang mainitong rally alang sa Lite Shipping ug maoy nangu sa opensa pinaagi sa pagkadlit og 27 puntos. Siya usab ang responsable sa 11-7 run alang sa Lite Shipping aron moposte og kuwatro puntos nga kadaugan.

 Si Allan Cabral, miantog og 24 puntos, samtang si ex-UV Lancer Dante Elim miabuno'g 19 puntos alang sa Lite Shipping ni coach Elmer 'Boy' Cabahug nga milubong sa CMS sa Game-1 sa iskor nga 106-75 sa miaging semana.

Si Franco Te, anak ni playing coach Dr. Boy Te, maoy nangu sa CMS pinaagi sa iyang 23 puntos, gisundan siya ni Inting Reyes nga adunay 19 puntos, samtang si Joselito Ocampo miamot og 13 puntos.

Ang awarding ceremony gikatakda karong Disyembre 18 diha sa College Assurance Plan (CAP) building sa Osmeña Blvd., ning dakbayan.

Sa laing bahin, ang Guy Lim Cup mopahigayon sa ilang labing unang All-Star Game karong adlawa uban ang tulo ka events nga tigian -- ang 3-point shootout, 3-on-3 challenge tali sa mga players sa fourth placer FAL Shipping batok sa CMS ug ang 2-ball competition. (BANATSPORTS)