Lagaras-Vergara tandem puhalan

CEBU, Philippines - Usa ka dakung upset ang gihimo nila ni Roman Ciflicli ug Ipek Yazuver sa Turkey dihang ilang gipilde ang pambato sa nasud nga sila si Charlea Lagaras ug Ronnier Vergara alang sa gold medal sa 2010 Cebu IDSF World Dancesport Open and 5th Dancesport sa Sugbu niadtong Domingo sa gabii diha sa Waterfront Cebu City Hotel and Casino.

Ang pambato sa nasud nga sila si Lagaras ug Vergara mao ang labing lig-ong kandidato alang sa open amateur latin, apan napuhalan sila sa mga Turkish sa katapusang round.

Ang Lagaras-Vergara tandem maoy miangkon sa silver medal, gisundan sa Bulgarian pair nila ni Petrov Naidenov Georgia ug Olga Eugenievna Sedova alang sa bronze medal.

Nakuhaan sab og suwerte ang mga Pinoy sa dancesport tungod kay ang top bet sa Cebu nga sila si Dearlie Gerodias ug John Erolle Melencia igo lang mipahiluna sa ikaupat, samtang sila si Brian James ug Karla Ocaña nalagpot sa ikatulo sa amateur modern standard class.

Namawi hinuon ang managsuong Ocaña dihang gisakmit nila ang closed Asian division, gisundan sa laing Pinoy tandem nila ni German Enriquez ug Jeanfer Salas sa ikaduha, samtang sila si Bernie Tumarong ug Miljane Camacho mipahiluna sa ikatulong dapit.

Samtang sa 5th Dancesport sa Sugbu, wala kaayo kahuygo ang Team Cebu City human sila gipalagpot sa ilang trono sa Manila squad.

Ang Manila mikolekta og 12 golds, unom silvers ug 10 bronzes, samtang ang host Cebu City nakakuha og 10 gold, 10 silver ug siyam ka bronze medals.

Mihatag og gold alang sa Cebu sa modern standard mao sila si Mae Pabuaya ug Samson Orlanes (adult-3), Danilo Gagani ug Princess Laurence Inocado (teacher-student), Mark Rhony Flores ug Michaelyn Ledaa (adult-2), Ianperson Baroc ug Noelyn Mie Pedrano (juvenile-2) ug Mathew Lumapas ug Sharmaine Maloloy-on sa youth-3 class.

Lima ka golds ang nakuha sa Cebu sa latin discipline sa pagpangulo nila ni Pabuaya ug Orlanes (adult-4), Wilbert Aunzo ug Pearl Mae Cañeda (youth-5), Jimmy Noel ug Mary Desiree Seraga (teacher-student), John Paul Mocorro ug Therese Andre Quilaton (junior-3) ug managsuong Rinzon ug Reyana Mae Elarcosa sa junior-5. (BANATSPORTS)