Team Froilan milangkat korona sa 2nd Talisay Beach Volley

CEBU, Philippines - Gilampurnas nilang Jusabelle Brillo ug Genie Sabas sa Team Froilan ang tandem nilang Apple Eve Saraum ug Mechelle Matuguina sa University of Southern Philippines Foundation (USPF) sa straight sets aron paglangkat sa korona sa 2nd Talisay Beach Volley kagahapon didto sa Brgy. Poblacion, Talisay City.

Si Brillo, sakop sa RP Team ug Sabas mipukan nilang Saraum ug Matuguina sa first set, 25-14 ug gitiwasan kini sa second set, 25-17.

Sa laing bahin, ang tandem nilang Kennette Garces ug Marissa Lagancia sa Volleyball Addicts maoy miangkon sa ikatulo nga dapit human gipilde ang paresan nilang Meteosheena Bate ug Suzette Panis sa University of San Carlos, 25-18, 25-19.

Gawas sa mga medalya ug tropeyo, ang Team Froilan mibulsa og P5,000 sa maong kadaugan, ang USPF nakadawat og P3,000, samtang ang Volleyball Addicts nakaangkon og P2,000.

Ang maong kompetisyon usa sa mga kalihukan sa 65th anniversary sa Takas sa Talisay. (BANATNEWS)