Gadapan mipaundang ni Balikug sa Mayor Cortes Boxing Series

CEBU, Philippines - Nanginahanglan lang og 39 segundos sa third round si Junel Gadapan aron paundangon si Erick Balikug sa Caintoys Boxing Club sa Mayor Jonas Cortes Boxing at the Park Amateur Series niadtong miaging adlaw diha sa Mandaue Plaza Square.

Si Gadapan sa Iligan City midabodabo ni Balikug pagsugod sa ikatulong hugna aron pagsakmit og daog ubos sa 63 kilogram division.

Sila si Jenard Caspe ug Vicente Seos-e Jr. sa Cabancalan Elementary School mikulit sab og daog batok sa tagsa-tagsa nila ka kaatbang.

Si Caspe miiskor og 3-0 batok ni Kint Mike Tuñacao sa Philippine-Australian Boxing Club sa 22 kgs. division, samtang si Seos-e mirehistro og daog batok ni Richard Rama sa Phil-Australian Club ubos sa 23 kgs. division.

Sila si Wendel Acharon ug Reoxyl Tabogon sa CNHS mimakmak sab sa ilang tagsa-tagsa ka kaatbang. Si Acharon midaog batok ni Jessie Dignos sa Flores Boxing Club ug Albert Maluya sa Cabancalan ubos sa 45 kgs. division. – BANAT NEWS