Hapee Online Cage Clinic gilusad

CEBU, Philippines - Gilauman nga moabot ngadto sa 100 ka partisipante ang mosalmot sa tinuig nga Hapee Online Basketball Camp "The Training Specialist" nga sugdan karong Abril 1 diha sa Cogon-Ramos gym, ning siyudad.

Ang cage clinic adunay duha ka Level - 1 ug 2. Ang Level 1 sugdan sa Abril 1 hangtod sa Abril 30, samtang ang Level 2 himuon gikan sa Mayo 1 hangtod sa Mayo 31.

Himuon kini sa gikan sa adlaw'ng Lunes hangtod sa Biyernes gikan sa alas-8 hangtod sa alas-10 sa buntag.

Si camp director ug kanhi PBA cager Mark Anthony Tallo nagkanayon nga ang matag partisipante mobayad og P1,100 nga registration fee, libre na ang basketball ug upper jersey.

Matud pa sa mapaubsanong si Tallo nga ang bugtong tuyo sa Hapee Online cage clinic mao lang ang pagtabang aron makat-on ang kabatan-onan ug wala kini nila gawiang negosyo hinungdan nga magkadaghan ang mosalmot sa matag tuig. "Mao ra nay among bentaha kay dili ni negosyo kun dili tabang gyud aron makakat-on ang mga bata," matud pa ni Tallo.

Si Tallo ug si Hapee-Cebu owner Jack Huang nakig-uban sa sportswriters sa usa ka luncheon meeting kagahapon didto sa Casa Verde sa Ramos.

Si Huang personal nga mipasalamat ni Tallo tungod sa pag-ani og mga maayong magduduwa nga sarang ikapasigarbo sa Hapee Online.

Gitumbok ni Huang ang 15-anyos nga si Mark Jayven Tallo, kinsa maoy napiling MVP sa Junior NBA Finals niadtong Pebrero 27 didto sa kaulohan. Naapil sab si Mark Jayven sa CESAFI Mythical Five sa juniors division dihang miduwa uban sa Cebu Institute of Technology (CIT) Wildkittens diin siya maoy topscorer.

Sa 39 ka players, kinsa naapil sa training pool sa Junior NBA, ang anak ni Tallo nga si Jayven maoy misulbong og maayo. Laing Sugbuanon nga si Gaber Araw-araw usa sab sa naapil sa training pool.

Si Tallo ug kaubanan gikatakdang molarga paingon sa Estados Unidos karong Abril 10 ug dad-on sila sa New York ug New Jersey ug may panahon pang makatan-aw og duwa sa NBA. – BANAT NEWS