Red Barako nagpabiling putli
Nagpabiling walay mantsa ang record sa Red Barako dihang gipatikangkang niini ang Green atol sa ilang engkwentro niadtong miaging gabii sa iskor 84-74 sa nagpadayong BAR 2nd conference 2008 didto sa Cogon-Central Ramos sports center, ning siyudad. Sa sayong bahin, gipahamtang dayon sa Red Barako ang ilang kabangis dihang mikulit kini og singko puntos nga labaw batok sa Green sa iskor 25-20.
Misamot ang gibating kainit sa Red Barako sa ikaduhang kuwarter dihang mipabuto og 16 puntos ang star player sa Green nga si Fernando “Bebot” Dysan sud lang sa unang kuwarter. Gipahungaw sa Red Barako ang gihuptan niining kainit hinungdan nga miabante ang bentaha ngadto sa 13 puntos sa iskor 46-33 pagkahuman sa first half.
Nagpabiling nagtakilid ang bandera sa Green sa ikatulong kuwarter samtang ang Red Barako nagkalingaw sa pagpamunit og mga puntos dungan ang pagpahugot sa ilang depensa.
Gitugbangan usab sa Green ang depensa nga gipa-ulan sa Red Barako apan pakyas kini sa ilang tinguhang labnihon ang labaw nga gisapwang sa Red Barako ug nagpabiling nag-aginod hangtod nga nahurot ang oras sa duwa.
Puntos Matag
RED BARAKO (84) – Birao 29, Navarro 15, Ferrer 10, Hammer 9, Panique 4, Ferrer 3, Casas 2, Leopats 1
GREEN (74) – Zamora 20, Dysan 18, dela Cruz 11, Rama 8, Sabay 6, Ramil 6, Tudtud 5
- Latest
- Trending
