M. Lhuillier Jewelers-Ginebra Kings showdown

Seguradong hugopan na usab sa mga katawhan ang "exhibition game" tali sa M. Lhuillier Kwarta Padala Jewelers ug sa crowd-darling Barangay Ginebra Kings karong alas-6:00 sa gabii diha sa Cebu Coliseum.

Ang M. Lhuillier Jewelers nga nangahas nga makabawi sa ilang sunod-sunod nga kaparotan batok sa PBA teams  mikuha og  American import nga si Michael Jamar Le Blanc aron modugang og kalig-on sa koponan ni Michel Lhuillier ug coach Raul 'Yayoy' Alcoseba.

Si Blanc, kinsa niduwa sa University of Connecticut, Vanderbilt University ug sa Houston Baptist University sa prestihiyosong NCAA Division I sa United States, miabot niadtong miaging adlaw ug mi-ensayo gilayon kini aron iyang masinati ang sistema sa M. Lhuillier.

"He's (Le Blanc) an all-around player. He can shoot, dribble, pass and rebound. I'm confident he would be of big help when we take on a very strong team such as Ginebra," matud pa ni Alcoseba.

Ang presensiya ni Le Blanc seguradong makatabang sa pagpalig-on sa frontline sa M. Lhuillier uban nilang Ron Capati, Marlon Basco, Leo Bat-og ug  Danny Aying.

Sila si Stephen Padilla, Woodrow Enriquez ug Dale Singson mao sab ang ibala sa backcourt, samtang sila si Bruce Dacia, Gerry Cavan ug Jayford Rodriguez gilauman sab nga mosuporta sa opensa sa kampo sa Jewelers.

Sa pikas bahin, ang Gin Kings mopaduwa sa ilang star players sama nilang Eric Menk, Jayjay Helterbrand, Mark Caguioa ug Ronald Tubid.

Moduwa sab nila silang Michael Holper, Billy Mamaril, Raffy Reavis, Sunday Salvacion, Mark Macapagal ug Macky Escalona.

Mao kini ang ikaduhang higayon sud sa duha ka semana ug ikaupat sa katibuk-ang 18 ka buwan nga ang M. Lhuillier moduwa uban sa PBA team diha sa Cebu Coliseum.

Sa miaging Pebrero 21, ang M. Lhuillier Jewelers nakigharong sa higanteng Talk N' Phone Pals diin napilde kini sa iskor nga 97-100.

Niadtong Agosto 2006, ang M. Lhuillier Jewelers milubong sa Sta. Lucia Realtors nga niadtong higayona gimaneho ni coach Alfrancis Chua sa iskor nga 82-69. Usa ka buwan ang milabay, ang ML Jewelers gipahamtangan og laing kapildihan sa San Miguel Beermen sa usa ka charity game nga  gipasiugdahan ni Dondon Hontiveros sa iskor nga 91-97.

Ang mga tiket sa M. Lhuillier-Ginebra showdown nagkantidad og P30 alang sa general admission, P100 sa upper box, P200 sa lower box ug P300 alang sa ringside.