Homecourt advantage hingpit na nga nakuha sa M. Lhuillier Kwarta Padala

Hingpit nga naangkon sa M. Lhuillier Kwarta Padala-Cebu Jewelers ang homecourt advantage sa kinatibuk-ang bahin sa playoffs sa ML Kwarta Padala Mindanao Visayas Basketball Association (MVBA) Second Conference Friday human ilang gipulbos ang Iligan Archangels, 104-95, sa miaging gabii didto sa MSU-IIT Gym sa dakbayan sa Iligan.

Ang Jewelers ni head coach Raul "Yayoy" Alcoseba alkansi og tres puntos, 35-38, apan si Troy Mercader mipasud og duha ka sunod-sunod nga itsada aron pagpalabaw sa M. Lhuillier, 39-38. Sila si Jayford Rodriguez ug Stephen Padilla miratsada sab dayon aron pag-inat sa ilang labaw ngadto sa 45-38 human sa first half.

Dunay nahitabo nga tensiyon sa ikatulong kuwarter diin si Francis Sanz sa Iligan na-ejected human gisukmag si Enrico Llanto sa oras nga 7:36 . Nagpabadlong sab silang Sammy Ayodelle ug Marlon Piodo nga nagbinigyanay usab sa nahabilin nga 4:24 sa dili pa ang katapusang kuwarter.

Bisan pa man niini, nagpabilin ang maayong opensa sa M. Lhuillier hinungdan nga miposte sila og 19 puntos nga bintaha, 80-61, sa nahibilin nga 10 minutos sa duwa.

Katapusang nagkasikit ang Iligan sa iskor nga 92-98 sa nahabiling 52 segundos sa duwa gumikan kay si Aldrin Ocañada milansang og duha ka sunod-sunod nga baskets aron pagselyado sa kadaugan sa Jewelers.

Si Padilla maoy nangulo sa M. Lhuillier bitbit ang 20 puntos, samtang si Llanto niamot og 17 puntos alang sa Jewelers, nga mipahugot og maayo sa ilang posisyon sa liderato bitbit ang baraha nga 8-1.