Kai Sotto sasalang sa NBA mini camps
MANILA, Philippines — Muling sasalang si Kai Sotto sa mini camps sa Amerika upang ipagpatuloy ang pangarap nitong makapaglaro sa NBA.
Walang pang eksaktong detalye kung kailan at saang team ito magpapartisipa.
Sinabi ni Wasserman Sports executive Tony Ronzone na pinaplantsa pa ang lahat upang makakuha ng pagkakataon ang 7-foot-3 Pinoy cager na muling maipamalas ang kanyang husay sa harap ng mga NBA coaches at trainers.
Si Ronzone ang nangangalaga sa basketball career ni Sotto.
Kasalukuyang nasa Pilipinas si Sotto matapos ang kampanya nito sa Yokohama B-Corsairs sa Japan B.League.
Nakapanood pa ito ng UAAP Season 86 women’s volleyball finals sa pagitan ng National University at University of Santo Tomas noong Miyerkules sa Mall of Asia Arena sa Pasay City.
Matapos ang ilang araw na pahinga, agad na tutulak si Sotto sa Amerika para sumailalim sa training camp para masigurong nasa magandang kundisyon ito bago sumabak sa NBA mini camps.
Noong nakaraang taon, nagpartisipa si Sotto sa mini camps ng iba’t ibang NBA teams.
Sumalang ito sa mini camps ng Utah Jazz, Dallas Mavericks at New York Knicks.
Nakasama si Sotto sa Orlando Magic sa NBA Summer League noong Hulyo.
Ngunit hindi naging maganda ang kampanya nito dahil sa iniinda nitong back injury.
- Latest